ក្រុមប្រឹក្សាសហភាពអឺរ៉ុប (EU) កាលពីថ្ងៃចន្ទ (ទី២៤ ខែវិច្ឆិកា) បានអនុម័តទឹកប្រាក់ចំនួន ៥៩,៥លានអឺរ៉ូ (ប្រហែល ៦៨,៥លានដុល្លារ) ជាជំនួយយោធា សម្រាប់កងកម្លាំងប្រដាប់អាវុធនៃសាធារណរដ្ឋប្រជាធិបតេយ្យកុងហ្គោ ឆាដ និងហ្ស៊កដានី ក្រោមមូលនិធិសន្តិភាពអឺរ៉ុប (EPF) ដោយមានគោលបំណងបង្កើនសមត្ថភាពការពារ និងសន្តិសុខ ក្នុងតំបន់។

ក្រុមប្រឹក្សា បានឲ្យដឹងនៅក្នុងសេចក្ដីថ្លែងការណ៍ថា ក្រុមប្រឹក្សាបានអនុម័តវិធានការជំនួយ ១០លានអឺរ៉ូ (១១,៥លានដុល្លារ) ដើម្បីផ្តល់ឲ្យកងកម្លាំងប្រដាប់អាវុធនៃសាធារណរដ្ឋប្រជាធិបតេយ្យកុងហ្គោ (FARDC) នូវគ្រឿងយុទ្ធោបករណ៍ ដែលជាវិធានការទី២ របស់ខ្លួន ក្នុងការគាំទ្រដល់កងកម្លាំងនេះ ដោយនាំឲ្យជំនួយសរុបរបស់ EPF ឡើងដល់ ៣០លានអឺរ៉ូ (៣៤,៥លានដុល្លារ) ហើយ។

ជាមួយគ្នានេះ ក្រុមប្រឹក្សាបានបញ្ជាក់ថា ជំនួយនេះនឹងពង្រឹងសមត្ថភាពរបស់ FARDC ក្នុងការការពារជនស៊ីវិល និងស្ដារអាជ្ញាធររដ្ឋ ដោយផ្តល់នូវគ្រឿងយុទ្ធោបករណ៍ដែលមិនបង្កគ្រោះថ្នាក់ដល់ជីវិត ដើម្បីគាំទ្រដល់ការបញ្ជា និងការគ្រប់គ្រង ធ្វើឲ្យប្រសើរឡើងនូវការដាក់ពង្រាយ និងប្រតិបត្តិការវេជ្ជសាស្រ្ត និងបើកការល្បាតឃ្លាំមើល តាមព្រំដែនទន្លេ ដោយការផ្គត់ផ្គង់រំពឹងមាននៅមុនដំណាច់ឆ្នាំ២០២៦។

ជាមួយគ្នានេះ ហើយយោងតាមក្រុមប្រឹក្សានេះ បានឲ្យដឹងទៀតថា ជំនួយ ១៤,៥លានអឺរ៉ូ (១៦,៧លានដុល្លារ) នឹងគាំទ្រដល់កងកម្លាំងប្រដាប់អាវុធនៃប្រទេសឆាដ (ANT) ដែលជាការគាំទ្រទ្វេភាគីដំបូងពី EPF របស់ EU ដល់ប្រទេសនេះ ដែលបានទទួលការគាំទ្រពីសហភាពអឺរ៉ុបរួចហើយ តាមរយៈក្រុមការងារពហុជាតិប្រឆាំងនឹងក្រុម Boko Haram និងកងកម្លាំង G5 Sahel Joint Force។

លើសពីនេះទៀត ក្រុមប្រឹក្សាក៏បានអនុម័ត ៣៥លានអឺរ៉ូ (៤០,៣លានដុល្លារ) ជាជំនួយរបស់ EPF ដើម្បីពង្រឹងកងកម្លាំងប្រដាប់អាវុធហ្ស៊កដានី ដែលនាំឲ្យការគាំទ្រសរុបរបស់សហភាពអឺរ៉ុប សម្រាប់ប្រទេសហ្ស៊កដានី ក្រោមកម្មវិធីនេះឡើងដល់ ៥៥,២៥លានអឺរ៉ូ (៦៣,៦៦លានដុល្លារ)៕