អង្គការសហប្រជាជាតិ (UN) កាលពីថ្ងៃចន្ទ (ទី២៤ ខែវិច្ឆិកា) បានឲ្យដឹងថា កាលពីឆ្នាំមុន រៀងរាល់ ១០នាទី ស្ត្រីម្នាក់នៅកន្លែងណាមួយ ក្នុងពិភពលោកនេះ ត្រូវបានសម្លាប់ដោយមនុស្សស្និទ្ធស្នាលនឹងនាង ខណៈដែលស្ថាប័ននេះបានរិះគន់ធ្ងន់ ចំពោះកង្វះវឌ្ឍនភាព ក្នុងការប្រយុទ្ធប្រឆាំងនឹងឃាតកម្មលើស្ត្រី។

ក្នុងរបាយការណ៍ដែលត្រូវបានចេញផ្សាយ ដើម្បីប្រារព្ធទិវាអន្តរជាតិលុបបំបាត់អំពើហិង្សាលើស្ត្រី ការិយាល័យ UN ទទួលបន្ទុកគ្រឿងញៀន និងឧក្រិដ្ឋកម្ម និងទីភ្នាក់ងារស្ត្រីរបស់ UN បានឲ្យដឹងថា ស្ត្រី និងក្មេងស្រីប្រមាណ ៥០.០០០នាក់ ត្រូវបានសម្លាប់ដោយដៃគូជិតស្និទ្ធ ឬសមាជិកគ្រួសារ ក្នុងឆ្នាំ២០២៤។

របាយការណ៍នេះបានរៀបរាប់ថា ៦០ភាគរយនៃស្ត្រីដែលត្រូវបានសម្លាប់ នៅជុំវិញពិភពលោក ត្រូវបានធ្វើឃាតដោយដៃគូ ឬសាច់ញាតិ ដូចជាឪពុក ពូ ម្តាយ និងបងប្អូនជាដើម។ ចំណែកជនរងគ្រោះ ក្នុងអំពើឃាតកម្មលើបុរស ១១ភាគរយត្រូវបានសម្លាប់ដោយមនុស្សជិតស្និទ្ធនឹងពួកគេ។

របាយការណ៍បានបន្ថែមថា តួលេខ ៥០.០០០នាក់នេះ ដោយផ្អែកលើទិន្នន័យពី ១១៧ប្រទេស មានន័យថា ស្ត្រី ១៣៧នាក់ ក្នុងមួយថ្ងៃ ឬប្រហែលម្នាក់រៀងរាល់ ១០នាទី បានបាត់បង់ជីវិតដោយសារឃាតកម្ម។

យោងតាមរបាយការណ៍នេះ បានឲ្យដឹងទៀតថា ចំនួនសរុបនេះ គឺទាបបន្តិចជាងតួលេខដែលត្រូវបានរាយការណ៍ ក្នុងឆ្នាំ២០២៣ តែវាមិនបង្ហាញពីការថយចុះជាក់ស្តែងនោះឡើយ ខណៈដែលវាភាគច្រើនមកពីទិន្នន័យខុសគ្នា ពីប្រទេសមួយទៅប្រទេសមួយ៕