រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយនៅថ្ងៃអង្គារ (ទី២៥ ខែវិច្ឆិកា) នេះថា ផែនការសន្តិភាពដែលត្រូវបានកែសម្រួល សម្រាប់អ៊ុយក្រែន ត្រូវតែឆ្លុះបញ្ចាំងពី «ស្មារតី និងលិខិត» នៃការយោគយល់គ្នាដែលបានឈានដល់ រវាងលោកប្រធានាធិបតី Vladimir Putin និងប្រធានាធិបតីអាមេរិក លោក Donald Trump នៅឯកិច្ចប្រជុំកំពូលរបស់មេដឹកនាំទាំង២ ក្នុងរដ្ឋ Alaska របស់សហរដ្ឋអាមេរិក។

អំឡុងពេលថ្លែងនៅឯសន្និសីទសារព័ត៌មាន ក្នុងទីក្រុងមូស្គូ លោក Lavrov បាននិយាយថា ប្រទេសរុស្ស៊ីបានស្វាគមន៍កំណែដំបូងនៃផែនការសន្តិភាពរបស់សហរដ្ឋអាមេរិក សម្រាប់អ៊ុយក្រែន ពោលជាអ្វីដែលទីក្រុងគីវ និងសម្ព័ន្ធមិត្តរបស់ខ្លួន ចាត់ទុកថា ផ្ដល់ផលចំណេញពេកដល់ទីក្រុងមូស្គូ ប៉ុន្តែកំពុងរង់ចាំកំណែ «បណ្តោះអាសន្ន» ដែលត្រូវបានកែសម្រួល បន្ទាប់ពីទីក្រុងវ៉ាស៊ីនតោនបានបញ្ចប់ការសម្របសម្រួលជាមួយអ៊ុយក្រែន និងអឺរ៉ុប។

ប្រសិនបើកំណែដែលត្រូវបានកែសម្រួល មិនបានឆ្លុះបញ្ចាំងពីអ្វីដែលលោក Putin និងលោក Trump បានពិភាក្សានៅពេលពួកលោកបានជួបគ្នានៅរដ្ឋ laska ក្នុងខែសីហាទេនោះ លោក Lavrov បានបញ្ជាក់ថា ប្រទេសរុស្ស៊ីដែលតំណាងរបស់ខ្លួន ត្រូវបានគេរាយការណ៍ថា កំពុងរៀបចំធ្វើកិច្ចពិភាក្សាបន្ថែមទៀតជាមួយសហរដ្ឋអាមេរិក នៅទីក្រុង Abu Dhabi របស់ប្រទេសអារ៉ាប់រួម នៅយប់ថ្ងៃអង្គារនេះ នឹងឆ្លើយតបពីទស្សនៈខុសគ្នាយ៉ាងខ្លាំង ចំពោះគំនិតផ្តួចផ្តើមនេះ។

លោក Lavrov បានលើកឡើងថា៖ «ការវាយតម្លៃរបស់យើង នៅតែមានសុពលភាព ដោយសារលក្ខខណ្ឌសំខាន់ៗនៃផែនការ (ដើម) របស់លោក Trump គឺផ្អែកលើការយោគយល់ ដែលបានឈានដល់នៅទីក្រុង Anchorage ក្នុងកិច្ចប្រជុំកំពូលរុស្ស៊ី-អាមេរិក កាលពីខែសីហាឆ្នាំនេះ។ ហើយគោលការណ៍ទាំងនេះ ដោយទូទៅត្រូវបានឆ្លុះបញ្ចាំងនៅក្នុងផែនការដែលយើងស្វាគមន៍»។ លោក Lavrov បានព្រមានថា៖ «ប្រសិនបើស្មារតី និងលិខិត នៅទីក្រុង Anchorage ត្រូវបានលុបនៅក្នុងផ្នែកនៃការយោគយល់គ្នាសំខាន់ៗដែលយើងបានបង្កើតឡើង នាពេលនោះ ពិតណាស់ វានឹងក្លាយជាស្ថានភាពខុសគ្នាជាមូលដ្ឋាន (សម្រាប់ប្រទេសរុស្ស៊ី)»៕