នាយកប្រតិបត្តិ លោក Vincent Clerc នៅថ្ងៃអង្គារ (ទី២៥ ខែវិច្ឆិកា) បានប្រាប់ឲ្យដឹងថា ក្រុមហ៊ុនដឹកជញ្ជូន Maersk នឹងចាត់វិធានការ ដើម្បីចាប់ផ្ដើមធ្វើនាវាចរណ៍ឡើងវិញ តាមរយៈផ្លូវសមុទ្រក្រហម ឆ្លងកាត់ព្រែកជីក Suez នៅពេលលក្ខខណ្ឌអំណោយផល។

គួរបញ្ជាក់ថា ក្រុមហ៊ុន Maersk បានចាប់ផ្តើមប្ដូរផ្លូវនាវាចេញពីឈូងសមុទ្រ Aden និងសមុទ្រក្រហមឆ្ពោះទៅចុងភាគខាងត្បូងនៃទ្វីបអាហ្រ្វិក កាលពីខែមករា ឆ្នាំ២០២៤ បន្ទាប់ពីមានការវាយប្រហារលើនាវាមួយគ្រឿងរបស់ខ្លួនដោយក្រុមហ៊ួទីរបស់ប្រទេសយេម៉ែន ដែលបានបើកការវាយប្រហារលើនាវានានា ដើម្បីបង្ហាញសាមគ្គីភាពជាមួយប៉ាឡេស្ទីន នៅតំបន់ហ្កាហ្សា។

នៅក្នុងសន្និសីទសារព័ត៌មានរួមជាមួយប្រធានអាជ្ញាធរព្រែកជីក Suez លោក Osama Rabie ក្នុងប្រទេសអេហ្ស៊ីប លោក Clerc បាននិយាយបន្ថែមថា ក្រុមហ៊ុនត្រូវបានជំរុញដោយដំណើរការសន្តិភាព នៅតំបន់ហ្កាហ្សា ដែលនឹងនាំឲ្យមានការធ្វើនាវាចរណ៍ដោយសេរី នៅច្រកសមុទ្រ Bab al-Mandab ដែលតភ្ជាប់ឈូងសមុទ្រ Aden និងសមុទ្រក្រហម។ 

លោក Clerc បាននិយាយថា៖ «ដោយបានឃើញនូវវឌ្ឍនភាពគួរឲ្យកត់សម្គាល់ ទាំងនៅតំបន់ហ្កាហ្សា និងច្រកសមុទ្រ Bab al-Mandab ក្រុមហ៊ុន Maersk នឹងចាត់វិធានការ ដើម្បីចាប់ផ្ដើមធ្វើនាវាចរណ៍ឡើងវិញ នៅជុំវិញច្រករបៀងភ្ជាប់លោកខាងកើត និងខាងលិច ឆ្លងកាត់ព្រែកជីក Suez និងសមុទ្រក្រហម ហើយធ្វើឲ្យការឆ្លងកាត់ប្រក្រតីឡើងវិញជាលំដាប់»។

លោក Clerc បានសង្កត់ធ្ងន់ថា៖ «ក្រុមហ៊ុន Maersk នឹងចាប់ផ្ដើមធ្វើនាវាចរណ៍ឡើងវិញ តាមសមុទ្រក្រហមឲ្យបានឆាប់ បើលក្ខខណ្ឌអំណោយផល ដ្បិតសុវត្ថិភាពនាវិករបស់យើង គឺជាអាទិភាពធំបំផុត»៕