ប្រធានាធិបតីអ៊ុយក្រែន លោក Volodymyr Zelenskuy បានលើកឡើងកាលពីថ្ងៃអង្គារ (២៥ វិច្ឆិកា) ថា ទីក្រុងគីវ បានត្រៀមខ្លួនរួចជាស្រេចហើយដើម្បីពន្លឿនក្របខណ្ឌសន្តិភាពដែលគាំទ្រដោយសហរដ្ឋអាមេរិក សម្រាប់ការបញ្ចប់សង្គ្រាមជាមួយរុស្ស៊ី ហើយនឹងពិភាក្សាចំណុចជាប់គាំងនានាជាមួយលោកប្រធានាធិបតីអាមេរិក Donald Trump ក្នុងកិច្ចពិភាក្សាមួយ ដែលលោកនិយាយថា គួរតែរួមបញ្ចូលសម្ព័ន្ធមិត្តអឺរ៉ុបផងដែរ។

ក្រុមមន្ត្រីអាមេរិក និងអ៊ុយក្រែន បាននិងកំពុងព្យាយាមដោះស្រាយការខ្វែងគំនិតគ្នាជុំវិញផែនការរបស់លោក Trump ដើម្បីបញ្ចប់ជម្លោះដ៏បង្ហូរឈាម និងបំផ្លិចបំផ្លាញបំផុតរបស់អឺរ៉ុប ចាប់តាំងពីសង្គ្រាមលោកលើកទីពីរមក ដោយអ៊ុយក្រែនបារម្ភថាអាចត្រូវបង្ខំឱ្យទទួលយកកិច្ចព្រមព្រៀងមួយដែលផ្អែកលើលក្ខខណ្ឌរបស់រុស្ស៊ី រួមទាំងសម្បទានទឹកដី។

នៅក្នុងច្បាប់ចម្លងនៃសុន្ទរកថាមួយទៅកាន់សម្ព័ន្ធមិត្តអឺរ៉ុប ដែលគេហៅថា “សម្ព័ន្ធនៃឆន្ទៈ” លោក Zelenskiy បានជំរុញឱ្យមេដឹកនាំអ៊ឺរ៉ុប ដាក់ចេញនូវក្របខណ្ឌមួយសម្រាប់ការដាក់ពង្រាយ "កម្លាំងធានា" ទៅកាន់អ៊ុយក្រែន និងបន្តគាំទ្រទីក្រុងគីវ ដរាបណាទីក្រុងមូស្គូ មិនបង្ហាញពីទំនោរចង់បញ្ចប់សង្រ្គាមរបស់ខ្លួន។

នៅក្នុងច្បាប់ចម្លងដែលមើលឃើញដោយសារព័ត៌មានរ៉យទ័រនោះ លោក Zelenskyy បានបន្ថែមថា "ក្របខណ្ឌសន្តិភាពកំពុងនៅលើតុចរចា ហើយអ៊ុយក្រែន ត្រៀមខ្លួនជាស្រេចដើម្បីឆ្ពោះទៅមុខរួមគ្នាជាមួយសហរដ្ឋអាមេរិក ដោយមានការចូលរួមផ្ទាល់ពីលោកប្រធានាធិបតី Trump"។ ក្រោយមក នៅថ្ងៃអង្គារដដែល លោក Trump បាននិយាយលើប្រព័ន្ធផ្សព្វផ្សាយសង្គមរបស់លោកថា កិច្ចចរចាបន្សល់ទុក "ចំណុចខ្វែងគំនិតមួយចំនួន" ដោយបន្ថែមថា "លោកទន្ទឹងរង់ចាំជួបជាមួយប្រធានាធិបតី Zelenskyy និងប្រធានាធិបតី Putin ក្នុងពេលឆាប់ៗនេះ ប៉ុន្តែនឹងជួបតែនៅពេលដែលកិច្ចព្រមព្រៀងបញ្ចប់សង្គ្រាម ត្រូវសម្រេចចុងក្រោយ ឬនៅក្នុងដំណាក់កាលចុងក្រោយប៉ុណ្ណោះ"៕