អ៊ុយក្រែននិយាយថា ខ្លួនគាំទ្រខ្លឹមសារនៃផែនការរបស់សហរដ្ឋអាមេរិក ដើម្បីបញ្ចប់សង្គ្រាមជាមួយរុស្ស៊ី ខណៈប្រធានាធិបតីអាមេរិក លោក Donald Trump បាននិយាយថាវឌ្ឍនភាពកំពុងត្រូវបានធ្វើឡើងលើការធានាកិច្ចព្រមព្រៀងមួយ ហើយថាលោកនឹងបញ្ជូនបេសកជនពិសេសរបស់លោកទៅកាន់ប្រទេសរុស្ស៊ី ដើម្បីពិភាក្សាជាមួយប្រធានាធិបតីលោក Vladimir Putin។  

កាលពីថ្ងៃអង្គារ២៥វិច្ឆិកាសប្ដាហ៍នេះ គេបានមើលឃើញសកម្មភាពការទូតយ៉ាងច្រើន បន្ទាប់ពីក្រុមអ្នកចរចាអាមេរិក និងអ៊ុយក្រែន បានជួបគ្នាពីរថ្ងៃមុននៅទីក្រុងហ្សឺណែវ ដើម្បីពិភាក្សាអំពីផែនការសន្តិភាពដំបូងរបស់លោក Trump ត្រូវបានអ៊ុយក្រែនមើលឃើញថា ជាបញ្ជីបំណងប្រាថ្នារបស់រុស្ស៊ី ដែលអំពាវនាវឱ្យទីក្រុងគីវ ប្រគល់ទឹកដីទៅឱ្យទីក្រុងមូស្គូ កំណត់ចំនួនយោធារបស់ខ្លួន និងបោះបង់ចោលការចូលរួមជាមួយសម្ព័ន្ធយោធាណាតូ។ 

ផែនការនេះត្រូវបានកែប្រែចាប់តាំងពីពេលនោះមក ដោយសំណើដែលកំពុងលេចចេញជារូបរាងនេះ ត្រូវបានគេរាយការណ៍ថា សម្របសម្រួលការព្រួយបារម្ភរបស់អ៊ុយក្រែន និងសម្ព័ន្ធមិត្តអឺរ៉ុបរបស់ខ្លួន។    

ថ្លែងក្នុងសន្និសីទតាមវីដេអូនៃអ្វីដែលហៅថា សម្ព័ន្ធនៃឆន្ទៈ ជាមួយមេដឹកនាំមកពីប្រទេសចំនួន៣០ ដែលគាំទ្រអ៊ុយក្រែន លោកប្រធានាធិបតី Volodymyr Zelenskyy បាននិយាយថា ទីក្រុងគីវ បានត្រៀមខ្លួនរួចជាស្រេចដើម្បីបោះជំហានទៅមុខជាមួយនឹងក្របខ័ណ្ឌ ដែលមិនទាន់បានចេញផ្សាយទោះលោកនៅតែត្រូវការដោះស្រាយចំណុចរសើបមួយចំនួនក៏ដោយ។    

មុននេះ មន្ត្រីអ៊ុយក្រែនមួយរូបបានប្រាប់ទីភ្នាក់ងារសារព័ត៌មាន Reuters ថា ទីក្រុងគីវគាំទ្រខ្លឹមសារនៃក្របខ័ណ្ឌនេះ។ ដោយឈរលើស្មារតីនៃសន្ទុះនោះ លោក Andriy Yermak ប្រធានបុគ្គលិករបស់លោក Zelenskyy ដែលបានដឹកនាំការចរចានៅទីក្រុងហ្សឺណែវ បានប្រាប់គេហទំព័រព័ត៌មានអាមេរិក Axios ថា ការធានាសន្តិសុខដែលអ៊ុយក្រែនកំពុងស្វែងរក មើលទៅរឹងមាំណាស់៕