ក្រុមមន្ត្រីបាននិយាយថា អគ្គិភ័យដ៏សន្ធោសន្ធៅបានលេបត្របាក់តំបន់សំណង់មិនរៀបរយដ៏ធំបំផុតមួយរបស់ទីក្រុងដាកា ប្រទេសបង់ក្លាដែស កាលពីល្ងាចថ្ងៃអង្គារ (២៥ វិច្ឆិកា) ដោយបានធ្វើឱ្យមនុស្សរាប់ម៉ឺននាក់បាត់បង់ផ្ទះសម្បែង ហើយបណ្ដាលឱ្យលំនៅឋានប្រកដំបូលស័ង្កសីរាប់ពាន់ខ្នង ក្លាយទៅជាគំនរបាក់បែក។

អណ្ដាតភ្លើងបានឆាបឆេះឡើងភ្លាមៗបន្ទាប់ពីថ្ងៃលិច នៅតំបន់ Korail កណ្តាលរដ្ឋធានីដាកា ដែលជាតំបន់សំណង់មិនរៀបរយធំបំផុត និងមានមនុស្សរស់នៅច្រើនបំផុតមួយ របស់ប្រទេសបង់ក្លាដែស។

តំបន់តាំងលំនៅនេះជាផ្ទះរបស់មនុស្សជិត ៨ម៉ឺននាក់ ដែលស្ថិតនៅចន្លោះសង្កាត់អ្នកមាន Gulshan និង Banani ហើយអមដោយអគារផ្ទះល្វែងទំនើបៗ។ អណ្តាតភ្លើងបានបានរាលដាល ហើយផ្សែងហុយយ៉ាងក្រាស់ឃ្មឹកបានគ្របដណ្ដប់លើតំបន់នេះ ខណៈមនុស្សម្នារត់ភៀសខ្លួនយ៉ាងចលាចល ដោយប្រមូលរបស់របរអ្វីក៏ដោយដែលអាចយកតាមខ្លួនបាន។

មន្ត្រីសេវាពន្លត់អគ្គិភ័យ ឈ្មោះ Talha Bin Zasim បាននិយាយថា យ៉ាងហោចណាស់មានរថយន្តពន្លត់អគ្គិភ័យចំនួន ១៩គ្រឿង ត្រូវបានបញ្ជូនទៅកន្លែងកើតហេតុ ចំណែកមូលហេតុនៃការឆាបឆេះនៅមិនទាន់ដឹងច្បាស់ទេ។ ការស្លាប់និងរបួសក៏មិនទាន់មានសេចក្តីរាយការណ៍ភ្លាមៗដែរ ប៉ុន្តែអ្នកស្រុកបាននិយាយថា ការបំផ្លិចបំផ្លាញគឺស្ទើតែទាំងស្រុងទៅហើយ៕