ប្រមុខការពារជាតិរ៉ូម៉ានី បានប្រាប់ឲ្យដឹងថា ប្រទេសសមាជិករបស់អង្គការណាតូ (NATO) មួយនេះ នឹងអាចដាក់ពង្រាយប្រព័ន្ធប្រឆាំងយានដ្រូនដែលផ្គត់ផ្គង់ដោយសហរដ្ឋអាមេរិក ក្នុងពេលឆាប់ៗនេះ ដើម្បីរារាំងការកើនឡើងនូវការរំលោភដែនអាកាសពីសំណាក់រុស្ស៊ី។

រដ្ឋមន្ត្រីក្រសួងការពារជាតិ លោក Ionut Mosteanu បាននិយាយថា ប្រព័ន្ធ Merops ថ្មី គឺជិតត្រូវបានដាក់ពង្រាយហើយ ខណៈដែលទីក្រុងមូស្គូកាន់តែបង្កើនការសាកល្បង ចំពោះសមត្ថភាពរបស់សម្ព័ន្ធមិត្តយោធា នៅព្រំដែនប៉ែកខាងកើតរបស់ខ្លួន។ ចំណែកឧត្តមសេនីយ៍អាមេរិក លោក Christopher Donahue ដែលបាននិយាយជាមួយលោក Mosteanu បានបញ្ជាក់ថា ប្រព័ន្ធនេះគឺស្ទើរតែត្រៀមរួចហើយ។

លោកឧត្តមសេនីយ៍ Donahue ដែលជាមេបញ្ជាការកងទ័ពអាមេរិក ប្រចាំតំបន់អឺរ៉ុប និងអាហ្រ្វិក បានប្រាប់អ្នកសារព័ត៌មាន នៅឯមូលដ្ឋានយោធា Mihail Kogalniceanu ក្បែរឆ្នេរសមុទ្រខ្មៅថា៖ «យើងបានសាកល្បងវា ហើយវាកំពុងស្ថិតនៅក្នុងដំណាក់កាលចុងក្រោយ ក្នុងការដាក់ពង្រាយ»។

គួរបញ្ជាក់ថា បណ្ដាមេដឹកនាំអឺរ៉ុប កំពុងស្វែងរករណសិរ្សរួបរួមមួយ នៅចំពោះមុខនៃការកើនឡើងនូវកាលុកលុយរបស់រុស្ស៊ី ជាពិសេសនៅក្នុងប្រទេសដែលមានព្រំដែនជាប់អ៊ុយក្រែន ដូចជារូម៉ានី និងប៉ូឡូញជាដើម។ ការកើនឡើងនូវចំនួននៃការលុកលុយរបស់យានដ្រូន បង្កឲ្យមានហានិភ័យដែលបង្ហាញពីភាពងាយរងគ្រោះរបស់ប្រទេសសមាជិកអង្គការណាតូ នៅព្រំដែនប៉ែកខាងកើតរបស់សម្ព័នភាព។

ហើយក្តីបារម្ភកំពុងកើនឡើងខ្ពស់ សម្រាប់រូម៉ានី ចាប់តាំងពីប្រទេសនេះរងប៉ះពាល់យ៉ាងខ្លាំង ដោយសារការសម្រេចចិត្តរបស់សហរដ្ឋអាមេរិក នាពេលថ្មីៗនេះ ក្នុងការកាត់បន្ថយចំនួនទាហាន នៅអឺរ៉ុប៕