សារព័ត៌មាន Yomiuri នៅថ្ងៃពុធ (ទី២៦ ខែវិច្ឆិកា) នេះ បានរាយការណ៍ថា ប្រជាប្រិយភាពខ្ពស់របស់នាយករដ្ឋមន្ត្រីជប៉ុន លោកស្រី Sanae Takaichi កំពុងជំរុញឲ្យគណបក្សប្រឆាំងបង្កើនការរៀបចំត្រៀម ក្នុងករណីដែលលោកស្រីសម្រេចប្រកាសឲ្យមានការបោះឆ្នោតមុនកាលកំណត់។

ការបោះឆ្នោតមុនអាណត្តិ ដែលអ្នកវិភាគខ្លះ លើកឡើងថា អាចនឹងកើតឡើងយ៉ាងឆាប់នៅខែមករា នឹងប៉ះពាល់ដល់គោលនយោបាយសេដ្ឋកិច្ចរបស់រដ្ឋបាល ក្នុងនោះរួមទាំងការពិភាក្សា អំពីផែនការសារពើពន្ធរយៈពេលវែងប្រចាំឆ្នាំរបស់ប្រទេសជប៉ុនផងដែរ ដែលគ្រោងនឹងធ្វើឡើងនៅក្នុងរង្វង់ខែមិថុនា ឆ្នាំ២០២៦។

ដោយអាស្រ័យលើពេលវេលាដែលការបោះឆ្នោតអាចនឹងត្រូវបានប្រកាស វាក៏អាចប៉ះពាល់ដល់ពេលវេលា និងល្បឿននៃការដំឡើងអត្រាការប្រាក់ដោយធនាគារកណ្តាលជប៉ុនផងដែរ ដែលជាធម្មតាជៀសវាងមិនធ្វើការផ្លាស់ប្តូរគោលនយោបាយធំៗ នៅមុនការបោះឆ្នោត។

នាយកប្រតិបត្តិនៃគណបក្សប្រជាធិបតេយ្យធម្មនុញ្ញជប៉ុន (CDPJ) ដែលជាគណបក្សប្រឆាំងដ៏ធំបំផុតរបស់ប្រទេសនេះ គឺលោក Jun Azumi បានផ្តល់សញ្ញាកាលពីថ្ងៃទី២៥ ខែវិច្ឆិកាថា គណបក្សរបស់លោកនឹងធ្វើការជាមួយគណបក្សផ្សេងទៀត ដើម្បីដណ្ដើមអាសនៈមកវិញពីក្រុមចម្រុះដែលកំពុងកាន់អំណាច។

ប្រធានគណបក្ស CDPJ លោក Yoshihiko Noda ត្រូវបានដកស្រង់សម្តីដោយប្រព័ន្ធផ្សព្វផ្សាយក្នុងស្រុក រួមទាំងសារព័ត៌មាន Yomiuri កាលពីដើមខែវិច្ឆិកានេះ ដែលបាននិយាយថា៖ «មានឱកាសល្អ ដែល (នាយករដ្ឋមន្ត្រី) អាចមានការពិចារណារំលាយសភា នៅដើមខែ»។

តែយ៉ាងណាក្ដី លោកស្រី Takaichi បានលើកឡើងម្តងហើយម្តងទៀតថា លោកស្រីមិនមានពេលវេលា ដើម្បីពិចារណាការបោះឆ្នោតមុនអាណត្តិឡើយ ហើយជំនួសមកវិញ នឹងផ្តោតលើការអនុវត្តគោលនយោបាយ ដើម្បីដោះស្រាយផលប៉ះពាល់សេដ្ឋកិច្ចពីការកើនឡើងនូវការចំណាយខ្ពស់នៃការរស់នៅ៕