ក្រុមហ៊ុនអាកាសចរណ៍អន្តរជាតិជាច្រើន បានផ្អាកជើងហោះហើររបស់ខ្លួនទៅនិងមកពីប្រទេសវ៉េណេស៊ុយអេឡា ដែលបង្កការរំខានដល់អ្នកដំណើរ។ ការផ្អាកនេះ បានកើតឡើងបន្ទាប់ពីនិយតករអាកាសចរណ៍សហរដ្ឋអាមេរិក រដ្ឋបាលអាកាសចរណ៍សហព័ន្ធ (FAA) បានព្រមានកាលពីសប្តាហ៍មុនអំពី «ស្ថានភាពសន្តិសុខកាន់តែអាក្រក់» នៅក្នុងប្រទេសវ៉េណេស៊ុយអេឡា។

បន្ទាប់ពីការព្រមានរបស់រដ្ឋបាលអាកាសចរណ៍សហព័ន្ធ (FAA) ក្រុមហ៊ុនអាកាសចរណ៍អន្តរជាតិជាច្រើន រួមមានក្រុមហ៊ុនIberiaរបស់ប្រទេសអេស្ប៉ាញ GOLរបស់ប្រទេសប្រេស៊ីល Aviancaរបស់ប្រទេសកូឡុំប៊ី និងក្រុមហ៊ុនLATAM មានមូលដ្ឋាននៅប្រទេសឈីលី បានលុបចោលជើងហោះហើរ និងផ្អាកផ្លូវទៅនិងមកពីប្រទេសវ៉េណេស៊ុយអេឡា ដោយការរំខានភាគច្រើនកើតឡើងនៅចន្លោះថ្ងៃទី២៤ ដល់ថ្ងៃទី២៨ ខែវិច្ឆិកា។

នៅអាកាសយានដ្ឋានអន្តរជាតិ Simon Bolivar ក្នុងទីក្រុង Maiquetia ជាអាកាសយានដ្ឋានមួយនៅជិតរដ្ឋធានី Caracas របស់ប្រទេសវ៉េណេស៊ុយអេឡា ប្រតិបត្តិការនៅតែមានស្ថេរភាព ហើយជើងហោះហើរភាគច្រើននៅតែបន្តដំណើរការដោយក្រុមហ៊ុនអាកាសចរណ៍ក្នុងស្រុករបស់ប្រទេសវ៉េណេស៊ុយអេឡា។ អ្នកដំណើរដែលវិលត្រឡប់ទៅប្រទេសវិញបាននិយាយថា ការផ្អាកប្រតិបត្តិការបណ្តោះអាសន្នរបស់ក្រុមហ៊ុនអាកាសចរណ៍អន្តរជាតិមួយចំនួនបានប៉ះពាល់ដល់ការរៀបចំគម្រោងរបស់ពួកគេ។