កម្មករសហជីពរាប់ពាន់នាក់ នៅទូទាំងប្រទេសឥណ្ឌា នៅថ្ងៃពុធ (ទី២៦ ខែវិច្ឆិកា) នេះ បាននាំគ្នាតវ៉ាប្រឆាំងនឹងការដាក់ចេញនូវច្បាប់ការងារថ្មីរបស់រដ្ឋាភិបាល ដោយនិយាយថា បទប្បញត្តិទាំងនោះនឹងនាំឲ្យមានការកេងប្រវ័ញ្ចសាជីវកម្ម និងបំផ្លាញសិទ្ធិដែលទទួលបានយ៉ាងលំបាករបស់ពួកគេ។

ប្រទេសមានសេដ្ឋកិច្ចធំជាងគេបំផុតទី៥ របស់ពិភពលោក កាលពីសប្តាហ៍មុន បានចាប់ផ្ដើមអនុវត្តច្បាប់ការងារដែលទន្ទឹងរង់ចាំមកជាយូរហើយ ពោលគឺជាអ្វីដែលនឹងមកជំនួសច្បាប់សម័យអាណានិគម និងសម្រួលដល់ភាពស្មុគស្មាញនៃបទប្បញ្ញត្តិ។

កំណែទម្រង់នេះ បង្រួបច្បាប់ការងារដែលមានស្រាប់ចំនួន ២៩ ឲ្យទៅជាច្បាប់សំខាន់ៗចំនួន ៤ ដោយចំនួនច្បាប់ត្រូវបានកាត់បន្ថយពីជាង ១.៤០០ ឲ្យសល់ប្រហែល ៣៥០ ប៉ុន្តែសហជីពលើកឡើងថា កំណែទម្រង់នេះនឹងប៉ះពាល់ដល់សិទ្ធិកម្មករ។

លោក Gautam Mody ទៅពីសហជីព New Trade Union Initiative បាននិយាយថា កម្មករមកពីគ្រប់ផ្នែកទាំងអស់ កំពុងតវ៉ានៅថ្ងៃពុធនេះ នៅខាងក្រៅរោងចក្រ និងនៅកណ្តាលទីក្រុងជាច្រើន។ លោក Mody បានប្រាប់បណ្ដាញសារព័ត៌មានថា៖ «កម្មករត្រូវបានរដ្ឋាភិបាលធ្វើឲ្យភ្ញាក់ផ្អើល។ យើងចង់បានភាពត្រឹមត្រូវ យុត្តិធម៌ និងសមធម៌ នៅចំពោះមុខច្បាប់ ដែលត្រូវបានបដិសេធ នៅក្រោមច្បាប់ថ្មីនេះ»។

ទោះបីជាបទប្បញ្ញត្តិថ្មីនេះ ធ្វើឲ្យប្រសើរឡើងនូវស្តង់ដារសុវត្ថិភាព និងអាណត្តិដែលធានាដល់អត្ថប្រយោជន៍សន្តិសុខសង្គម សម្រាប់កម្មករនិយោជិតក៏ដោយ ក៏ច្បាប់នេះអនុញ្ញាតឲ្យមានវេនការងារនៅរោងចក្រយូរជាងមុន ធ្វើឲ្យកម្មករកាន់តែពិបាកធ្វើកូដកម្ម និងផ្ដល់ភាពងាយស្រួលដល់ក្រុមហ៊ុនកម្រិតមធ្យមបណ្តេញបុគ្គលិក។

ការផ្ដល់លក្ខខណ្ឌដ៏ចម្រូងចម្រាសនេះ បង្កើនកម្រិត ដើម្បីឲ្យក្រុមហ៊ុនដែលត្រូវការការអនុញ្ញាតពីរដ្ឋាភិបាលជាមុន ក្នុងការបញ្ឈប់បុគ្គលិកពីចំនួន ១០០ ទៅ ៣០០នាក់ ដែលមានន័យថា ក្រុមហ៊ុនដែលមាននិយោជិតរហូតដល់ ៣០០នាក់ អាចកាត់បុគ្គលិក ដោយមិនចាំបាច់មានការយល់ព្រមណាមួយឡើយ៕