រដ្ឋអាជ្ញាពិសេសរបស់កូរ៉េខាងត្បូង នៅថ្ងៃពុធ (ទី២៦ ខែវិច្ឆិកា) នេះ បានស្វែងរកការផ្ដន្ទាទោសជាប់ពន្ធនាគាររយៈពេល ១៥ឆ្នាំ សម្រាប់អតីតនាយករដ្ឋមន្ត្រី លោក Han Duck-soo ជុំវិញការចោទប្រកាន់ ដែលថា លោកបានជួយដល់កិច្ចប្រឹងប្រែងមិនជោគជ័យរបស់អតីតប្រធានាធិបតី លោក Yoon Suk Yeol ក្នុងការដាក់ចេញច្បាប់អាជ្ញាសឹក កាលពីខែធ្នូឆ្នាំមុន។

លោក Han ត្រូវបានគេរំពឹងថា នឹងក្លាយជាអតីតសមាជិកគណៈរដ្ឋមន្ត្រីដំបូងគេ ដែលត្រូវបានទទួលសេចក្ដីសម្រេចពីតុលាការជាន់ទាប ជុំវិញការចោទប្រកាន់ព្រហ្មទណ្ឌ ទាក់ទងនឹងច្បាប់អាជ្ញាសឹក ហើយករណីរបស់លោក អាចក្លាយជាគំរូ សម្រាប់ការកាត់ក្តីបច្ចុប្បន្នរបស់លោក Yoon និងសេចក្តីសម្រេចផ្សេងទៀតដែលត្រូវបានរំពឹងថា នឹងកើតមានបន្តបន្ទាប់។ តុលាការបានឲ្យដឹងថា សេចក្ដីសម្រេច លើសំណុំរឿងរបស់លោក Han នឹងត្រូវធ្វើនៅថ្ងៃទី២១ ខែមករាឆ្នាំក្រោយ។

រដ្ឋអាជ្ញាមួយរូបបាននិយាយនៅថ្ងៃពុធនេះថា៖ «យើងជឿជាក់ថា ការដាក់ទណ្ឌកម្មយ៉ាងធ្ងន់ធ្ងរលើចុងចោទ (លោក Han) គឺជារឿងចៀសមិនផុតឡើយ ដើម្បីការពារកុំឲ្យមានប្រវត្តិសាស្រ្តអាក្រក់បែបនេះកើតឡើងម្តងទៀត»។

គួរបញ្ជាក់ថា លោគ Han ត្រូវបានចោទប្រកាន់ពីបទជួយ និងគាំទ្រដល់តួនាទីរបស់លោក Yoon ជា «មេគំនិតបះបោរ» ដែលបានប្រកាសច្បាប់អាជ្ញាសឹកគ្រាអាសន្នដោយខុសច្បាប់។ យោងតាមការចោទប្រកាន់នោះ បានបញ្ជាក់ថា លោក Han មានកាតព្វកិច្ចពិនិត្យមើលការរំលោភបំពានសិទ្ធិអំណាច តាមអំពើចិត្តរបស់ប្រធានាធិបតី ក្នុងឋានៈជានាយករដ្ឋមន្ត្រី ដែលជា «អ្នកត្រួតត្រាលំដាប់ទី២ ក្នុងកិច្ចការរដ្ឋ»៕