ក្រសួងសុខាភិបាល នៅតំបន់ហ្កាហ្សាដែលគ្រប់គ្រងដោយក្រុមហាម៉ាស បានឲ្យដឹងថា អ៊ីស្រាអែលបានប្រគល់សាកសពអ្នកទោសប៉ាឡេស្ទីនចំនួន ១៥នាក់ នៅថ្ងៃពុធ (ទី២៦ ខែវិច្ឆិកា) ក្រោមកិច្ចព្រមព្រៀងបទឈប់បាញ់ដែលត្រូវបានសម្របសម្រួលដោយសហរដ្ឋអាមេរិក។

ក្រសួងបានឲ្យដឹងនៅក្នុងសេចក្តីថ្លែងការណ៍មួយថា៖ «ក្រសួងសុខាភិបាល ប្រកាសពីការទទួលសាកសពចំនួន ១៥នាក់នៃទុក្ករបុគ្គលដែលត្រូវបានប្រគល់នៅថ្ងៃនេះដោយអ្នកត្រួតត្រា គឺអ៊ីស្រាអែល តាមរយៈគណៈកម្មាធិការកាកបាទក្រហមអន្តរជាតិ (ICRC) ដែលនាំឲ្យចំនួនសាកសពសរុបដែលទទួលបាន មានដល់ ៣៤៥នាក់ហើយ»។

ប្រភពវេជ្ជសាស្រ្ត នៅមន្ទីរពេទ្យ Nasser របស់តំបន់ហ្កាហ្សា នៅភាគខាងត្បូងនៃទីក្រុង Khan Younis បានបញ្ជាក់ថា ខ្លួនបានទទួលសាកសពចំនួន ១៥នាក់ តាមរយៈកាកបាទក្រហម។

គួរបញ្ជាក់ថា នៅក្រោមកិច្ចព្រមព្រៀងឈប់បាញ់ដែលបានចូលជាធរមានកាលពីថ្ងៃទី១០ ខែតុលា អ៊ីស្រាអែលត្រូវបានតម្រូវឲ្យប្រគល់សាកសពជនជាតិប៉ាឡេស្ទីនចំនួន ១៥នាក់ សម្រាប់ការប្រគល់ត្រឡប់នូវអ្នកស្លាប់ជនជាតិអ៊ីស្រាអែលម្នាក់។

សាកសពទាំង ១៥នាក់ ដែលបានប្រគល់នៅថ្ងៃទី២៦ ខែវិច្ឆិកានេះ គឺជាថ្នូរនឹងអដ្ឋិធាតុរបស់លោក Dror Or ជាម្នាក់ ក្នុងចំណោមចំណាប់ថ្នូរ ៣នាក់ចុងក្រោយដែលត្រូវបានឃុំខ្លួននៅក្នុងដែនដីប៉ាឡេស្ទីន។ សាកសពរបស់លោកត្រូវបានប្រគល់ឲ្យអ៊ីស្រាអែលកាលពីថ្ងៃទី២៥ ខែវិច្ឆិកា ដោយពួកសកម្មប្រយុទ្ធនេះ តាមរយៈ ICRC ។