យោងតាមអាជ្ញាធរមូលដ្ឋាន ភ្លៀងធ្លាក់ខ្លាំងបានបង្កឱ្យមានទឹកជំនន់ និងបំណាក់ដីដ៏បំផ្លិចបំផ្លាញនៅទូទាំង ខេត្តកោះស៊ូម៉ាត្រា ខាងជើង (North Sumatra) របស់ប្រទេសឥណ្ឌូនេស៊ី ខណៈចំនួនអ្នកស្លាប់បានបន្តកើនឡើងដល់ ២៤នាក់ និងបណ្ដាលឱ្យមនុស្សរាប់សិបនាក់ផ្សេងទៀតបាត់ខ្លួន គិតត្រឹមថ្ងៃព្រសហ្បតិ៍ ទី២៧ វិច្ឆិកា សប្ដាហ៍នេះ ។    

ភ្លៀងធ្លាក់ឥតឈប់ឈរជាច្រើនថ្ងៃចាប់តាំងពីថ្ងៃចន្ទដើមសប្ដាហ៍នេះមក បានរុញឱ្យទឹកទន្លេនៅខេត្ត ស៊ូម៉ាត្រា ខាងជើង ហក់ឡើងហៀរច្រាំង បណ្តាលឱ្យមានលំហូរល្បាប់ ថ្ម និងផ្ដួលរំលំដើមឈើ ទូទាំងភូមិឋាននានាក្នុងតំបន់ចំនួន៦។

នគរបាលជាតិបាននិយាយកាលពីថ្ងៃពុធសប្ដាហ៍នេះថា ក្រុមជួយសង្គ្រោះកំពុងប្រឹងប្រែងទៅឲ្យដល់សហគមន៍ដាច់ស្រយាល ខណៈផ្លូវដែលរងការបំផ្លិចបំផ្លាញ និងភ្លៀងធ្លាក់ជាប់រហូត បន្តធ្វើឱ្យប្រតិបត្តិការយឺតយ៉ាវ។

ក្រុមអាជ្ញាធរបាននិយាយថា សាកសពចំនួនប្រាំនាក់ និងអ្នករស់រានមានជីវិតដែលរងរបួសចំនួនបីនាក់ត្រូវបានរកឃើញនៅក្នុងទីក្រុងឆ្នេរសមុទ្រ Sibolga ជាតំបន់ដែលរងផលប៉ះពាល់ខ្លាំងបំផុតដោយទឹកជំនន់។

នៅតំបន់ Central Tapanuli ដែលនៅជិតខាង បំណាក់ដី បានបំផ្លាញផ្ទះជាច្រើនខ្នង ដោយបានសម្លាប់សមាជិកយ៉ាងហោចណាស់បួននាក់នៃគ្រួសារមួយ ខណៈទឹកជំនន់ធ្ងន់ធ្ងរបានជន់លិចផ្ទះ និងអគារសាធារណៈជិត ២.០០០ ខ្នង៕