យោងតាមអាជ្ញាធរបានឱ្យដឹងថា ចំនួនអ្នកជម្លៀសខ្លួនបានកើនឡើងជិត ២៥.០០០នាក់ហើយ នៅក្នុងប្រទេសម៉ាឡេស៊ី គិតត្រឹមថ្ងៃពុធ ទី២៦ ខែវិច្ឆិកា ដោយមានរដ្ឋចំនួន១០ បានរងផលប៉ះពាល់នៅទូទាំងប្រទេស ដោយសារតែទឹកជំនន់ក្នុងរដូវមូសុងភាគឦសាននាពេលបច្ចុប្បន្ន។

រដ្ឋ Kelantan នៅតែជាតំបន់រងគ្រោះខ្លាំងជាងគេ ដោយមានអ្នកជម្លៀសដោយទឹកជំនន់ជិត ១ម៉ឺននាក់ ហើយតំបន់រងផលប៉ះពាល់ធ្ងន់ធ្ងរផ្សេងទៀតរួមមាន រដ្ឋ Perak រដ្ឋ Selangor និងរដ្ឋ Kedah ស្ថិតក្នុងចំណោមរដ្ឋប៉ះពាល់ទាំង១០ នៅទូទាំងប្រទេស។ ប្រព័ន្ធផ្សព្វផ្សាយនិយាយថា មនុស្សយ៉ាងហោចណាស់ម្នាក់ បានស្លាប់ក្នុងទឹកជំនន់ម៉ាឡេស៊ី។

ជាមួយគ្នានេះ ប្រធាននាយកដ្ឋានឧតុនិយមម៉ាឡេស៊ី លោក Ambun Dindang បាននិយាយថា ទឹកជំនន់នៅទូទាំងរដូវមូសុងឦសាននេះ មិនត្រឹមតែដោយសារទឹកភ្លៀងលើសលប់ប៉ុណ្ណោះទេ ប៉ុន្តែក៏ដោយសារកត្តាទាក់ទងនឹងដីផងដែរ ដូចជាការផ្លាស់ប្តូរនៃការប្រើប្រាស់ដីធ្លី ដង់ស៊ីតេប្រជាជន និងប្រសិទ្ធភាពនៃប្រព័ន្ធលូក្នុងស្រុក។

មន្រ្តីជាន់ខ្ពស់ម៉ាឡេស៊ី បាននិយាយថា រដ្ឋាភិបាលបានដាក់ពង្រាយជាង ១០ម៉ឺនភ្នាក់ងារ ទាំងបុគ្គលិកនិងធនធាន មកពីទីភ្នាក់ងារជាច្រើន ឱ្យចុះទៅកាន់រដ្ឋរងផលប៉ះពាល់ដោយទឹកជំនន់ដ៏ធ្ងន់ធ្ងរ ក្នុងអំឡុងរដូវមូសុងនេះ៕