រុស្ស៊ី៖ ប្រធានាធិបតីរុស្ស៊ីលោក Vladimir Putin បានជួបជាមួយប្រធានាធិបតីបេឡារុស្សលោក Alexander Lukashenko នៅទីក្រុងមូស្គូ ដើម្បីពិភាក្សាអំពីសមយុទ្ធយោធារួមគ្នាដែលកំពុងបន្តនៅក្នុងប្រទេសបេឡារុស្ស មានព្រំដែនជាប់ប្រទេសអ៊ុយក្រែន។ សមយុទ្ធទ្រង់ទ្រាយធំចូលរួមដោយកងកម្លាំងរុស្ស៊ីផ្លាស់ប្តូរពីតំបន់ចុងបូព៌ា បានជំរុញឱ្យមានការព្រួយបារម្ភពីប្រទេសលោកខាងលិចថា ពួកគេអាចប្រើសមយុទ្ធដើម្បីឈ្លានពានចូលទៅកាន់រដ្ឋធានីប្រទេសអ៊ុយក្រែន។
លោក Putin និយាយថា មេដឹកនាំទាំងពីរបានយល់ព្រមបន្តវិធានការចាំបាច់ទាំងអស់រួមគ្នា ដើម្បីផ្តល់សន្តិសុខសម្រាប់ប្រទេសទាំងពីរ។ លោកបានទទូចថា សមយុទ្ធរួមនេះមានលក្ខណៈការពារទាំងស្រុង ហើយគ្មានការគំរាមកំហែងដល់ប្រទេសណាមួយឡើយ។ ប្រធានាធិបតីរុស្ស៊ីលោក Vladimir Putin បានស្វាគមន៍សមភាគីបេឡារុស្សលោក Alexander Lukashenko ខណៈមេដឹកនាំទាំងពីរមានផែនការពិនិត្យសមយុទ្ធនុយក្លេអ៊ែររួមគ្នា។ ក្រសួងការពារជាតិរុស្ស៊ីបាននិយាយថា សមយុទ្ធនៅថ្ងៃសៅរ៍នេះនឹងរួមបញ្ចូលការអនុវត្តជាច្រើននៃមីស៊ីលផ្លោងអន្តរទ្វីប។ ប្រធានាធិបតីបេឡារុស្សលោក Alexander Lukashenko និយាយថា យើងមិនចង់បានសង្គ្រាមនោះទេ។
ការព្រួយបារម្ភភ្លាមៗបានផ្តោតលើភាគខាងកើតប្រទេសអ៊ុយក្រែន ជាកន្លែងដែលកងកម្លាំងអ៊ុយក្រែនបានប្រយុទ្ធជាមួយក្រុមឧទ្ទាមគាំទ្រដោយរុស្ស៊ីចាប់តាំងពីឆ្នាំ២០១៤ ក្នុងជម្លោះដែលបណ្តាលឲ្យមនុស្សប្រមាណ ១៤,០០០នាក់ស្លាប់។ មន្ត្រីសហរដ្ឋអាមេរិក និងអឺរ៉ុបបានផ្តោតលើទាហានរុស្ស៊ីប្រមាណ ១៥០,០០០នាក់ដែលដាក់ពង្រាយនៅជុំវិញព្រំដែនប្រទេសអ៊ុយក្រែន និងបានព្រមានថា ជម្លោះផ្តាច់ខ្លួនដ៏រ៉ាំរ៉ៃនៅភាគខាងកើតប្រទេសអ៊ុយក្រែនអាចបង្កការវាយប្រហារកាន់តែងាយ៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
