ប្រភពចំនួនបីដែលដឹងពីបញ្ហានេះបានប្រាប់សារព័ត៌មានរ៉យទ័រថា សេចក្ដីព្រាងរបស់សហរដ្ឋអាមេរិក នៃផែនការសន្តិភាព ២៨ចំណុច — ដែលត្រូវរាយការណ៍ថាបង្រួមមកត្រឹម ១៩ចំណុចវិញ — ដើម្បីបញ្ចប់សង្រ្គាមនៅអ៊ុយក្រែន បានគូសវាសចេញពីឯកសារមួយដែលសរសេរដោយរុស្ស៊ី។ ប្រភពនិយាយថា ឯកសាររុស្ស៊ីនោះ ត្រូវដាក់ជូនទៅកាន់រដ្ឋបាលលោកប្រធានាធីបតីអាមេរិក Donald Trump កាលពីខែតុលា។

ប្រភពលើកឡើងថា មន្រ្តីរុស្ស៊ី បានចែករំលែកឯកសារដែលរៀបរាប់ពីលក្ខខណ្ឌរបស់ទីក្រុងមូស្គូសម្រាប់ការបញ្ចប់សង្រ្គាមនេះ ឱ្យទៅដល់មន្ត្រីជាន់ខ្ពស់អាមេរិក កាលពីពាក់កណ្តាលខែតុលា បន្ទាប់ពីកិច្ចប្រជុំមួយរវាងប្រធានាធិបតីអាមេរិក Trump និងសមភាគីអ៊ុយក្រែន លោក Volodymyr Zelenskyy ក្នុងទីក្រុងវ៉ាស៊ីនតោន។

ឯកសារ ដែលក្នុងការទូតហៅថា "ឯកសារមិនផ្លូវការ" នេះ មានឃ្លាដែលរដ្ឋាភិបាលរុស្ស៊ី ធ្លាប់បានដាក់នៅលើតុចរចាកន្លងមក រួមទាំងសម្បទានដែលអ៊ុយក្រែនបានបដិសេធ ដូចជាការប្រគល់ទឹកដីមួយភាគធំនៅភាគខាងកើត។ សេតវិមានមិនបានអត្ថាធិប្បាយដោយផ្ទាល់លើឯកសារមិនផ្លូវការនេះទេ ប៉ុន្តែបានលើកឡើងពីការអត្ថាធិប្បាយរបស់លោក Trump ដែលថា លោកមានសុទិដ្ឋិនិយមចំពោះវឌ្ឍនភាពលើផែនការសន្តិភាពនេះណាស់។

គេមិនច្បាស់ទេថា ហេតុអ្វីបានជារដ្ឋបាលលោក Trump ត្រូវពឹងផ្អែកលើឯកសាររុស្ស៊ី ដើម្បីជួយរៀបចំផែនការសន្តិភាពរបស់ខ្លួន។ ប្រភពនិយាយថា មន្ត្រីជាន់ខ្ពស់អាមេរិកមួយចំនួនដែលបានពិនិត្យឯកសារនោះ រួមទាំងរដ្ឋមន្រ្តីការបរទេស Marco Rubio ជឿថា ការទាមទារដែលធ្វើឡើងដោយទីក្រុងមូស្គូ ទំនងជានឹងត្រូវច្រានចោលទាំងស្រុងដោយអ៊ុយក្រែន។ ប្រភពបន្ថែមថា ផែនការនេះត្រូវបានកែសម្រួលបន្ទាប់ពីមានការរិះគន់ ហើយត្រូវបង្រួមមកនៅត្រឹមក្របខណ្ឌ ១៩ចំណុច បន្ទាប់ពីការចរចារវាងមន្រ្តីអាមេរិក និងអ៊ុយក្រែន៕