អគ្គលេខាធិការអង្គការសហប្រជាជាតិ លោក Antonio Guterres កំពុងតាមដានស្ថានការណ៍នៅក្នុងប្រទេសហ្គីណេប៊ីស្សូ "ដោយក្តីបារម្ភយ៉ាងខ្លាំង" បន្ទាប់ពីយោធារបស់ប្រទេសនេះបានទម្លាក់ប្រធានាធិបតី Umaro Sissoco Embalo កាលពីថ្ងៃពុធ (២៦ វិច្ឆិកា)។

អ្នកនាំពាក្យ លោក Stephane Dujarric បានប្រាប់អ្នកយកព័ត៌មានថា "ប្រមុខ UN អំពាវនាវដល់ភាគីពាក់ព័ន្ធថ្នាក់ជាតិទាំងអស់នៅហ្គីណេប៊ីស្សូ ឱ្យមានការអត់ធ្មត់ ហើយអនុវត្ត និងគោរពតាមច្បាប់"។

នៅមុននោះ យោធារបស់ហ្គីណេប៊ីស្សូ បានប្រកាសថា ខ្លួនដណ្ដើមអំណាច ដោយទម្លាក់តំណែងលោក Embalo បិទព្រំដែនផ្លូវគោក ផ្លូវទឹក និងផ្លូវអាកាសទាំងអស់របស់ប្រទេស ហើយនឹងដាក់បម្រាមគោចរ ដោយអះអាងថា ដោយសារតែខ្លួនបានរកឃើញផែនការមួយ ប៉ុនប៉ង "បង្កអស្ថិរភាពដល់ប្រទេសជាតិ"។ មន្ត្រីយោធាមួយក្រុម ដែលហៅខ្លួនថាជា "បញ្ជាការដ្ឋានយោធាជាន់ខ្ពស់សម្រាប់ការស្ដារសន្តិសុខជាតិ និងសណ្តាប់ធ្នាប់សាធារណៈឡើងវិញ" បានប្រកាសថា ពួកគេ "កាន់កាប់អំណាចពេញលេញរបស់រដ្ឋ" នៅក្នុងសេចក្តីថ្លែងការណ៍មួយចាក់ផ្សាយតាមទូរទស្សន៍រដ្ឋ។

រដ្ឋប្រហារនេះបានកើតឡើងនៅពេលដែលអ្នកនយោបាយ ២រូបកាលពីថ្ងៃចន្ទ បានអះអាងជ័យជម្នះក្នុងការបោះឆ្នោតប្រធានាធិបតី ដែលបានធ្វើឡើងកាលពីចុងសប្តាហ៍កន្លងទៅ ខណៈលទ្ធផលផ្លូវការនៅតែមិនទាន់ប្រកាសនៅឡើយ៕