ទីប្រឹក្សាគោលនយោបាយការបរទេសជាន់ខ្ពស់របស់វិមានក្រឹមឡាំង លោក Yury Ushakov បានប្រាប់ប្រព័ន្ធផ្សព្វផ្សាយរដ្ឋកាលពីថ្ងៃពុធ២៦វិច្ឆិកាសប្ដាហ៍នេះ ថា ក្រុមមន្ត្រីរុស្ស៊ី និងសហរដ្ឋអាមេរិកមិនបានពិភាក្សាពីផែនការចុងក្រោយរបស់សេតវិមានដើម្បីបញ្ចប់សង្គ្រាមនៅអ៊ុយក្រែនក្នុងអំឡុង ពេលចរចានៅទីក្រុងអាប៊ូដាប៊ីមួយថ្ងៃមុននោះទេ ខណៈលោកប្រធានាធិបតី Donald Trump បាននិយាយថា លោកនឹងបញ្ជូនបេសកជនពិសេសរបស់លោក គឺលោក Steve Witkoff ទៅកាន់ទីក្រុងមូស្គូ ដើម្បីបង្ហាញសំណើសន្តិភាពទៅកាន់លោក Vladimir Putin។  

លោក Ushakov បានប្រាប់ប្រព័ន្ធផ្សព្វផ្សាយរដ្ឋថា អត់ទេ ផែនការសន្តិភាពមិនត្រូវបានពិភាក្សានៅទីក្រុងអាប៊ូដាប៊ីប្រទេសអារ៉ាប់រួមឡើយ។លោកថាទីក្រុងមូស្គូបានទទួលសេចក្តីព្រាងថ្មីបំផុតរបស់សហរដ្ឋអាមេរិក ប៉ុន្តែថាផែនការសន្តិភាពមិនត្រូវបានពិភាក្សាជាមួយនរណាម្នាក់លម្អិតទាល់តែសោះ។

លោក Ushakov បាននិយាយថា ទិដ្ឋភាពមួយចំនួននៃសំណើនេះអាចចាត់ទុកថាវិជ្ជមាន ប៉ុន្តែបានបន្ថែមថាទិដ្ឋភាពជាច្រើនតម្រូវឱ្យមានការពិភាក្សាពិសេសរវាងក្រុមអ្នកជំនាញ។ លោកក៏បានអះអាងផងដែរថា វាមិនចាំបាច់ទាល់តែសោះសម្រាប់មន្ត្រីអឺរ៉ុបក្នុងការចូលរួមដំណើរការនេះ។ 

យោងតាមទីប្រឹក្សាវិមានក្រឹមឡាំងរូបនេះ កិច្ចប្រជុំទីក្រុងអាប៊ូដាប៊ី បានផ្តោតលើបញ្ហាសន្តិសុខជាក់ស្តែង រួមទាំងការដោះដូរអ្នកទោស និងពាក់ព័ន្ធនឹងមន្ត្រីសន្តិសុខអ៊ុយក្រែន និងរុស្ស៊ី។

កិច្ចពិភាក្សាទាំងនោះក៏រួមបញ្ចូលទាំងលោក Dan Driscoll មេបញ្ជាការកងទ័ពសហរដ្ឋអាមេរិក ដែលបានរៀបចំកិច្ចប្រជុំដាច់ដោយឡែកជាមួយគណៈប្រតិភូរុស្ស៊ី ផងដែរ ស្របពេលបន្តការពិភាក្សាកាលពីចុងសប្តាហ៍មុននៅទីក្រុងហ្សឺណែវរវាក្រុមងមន្ត្រីសហរដ្ឋអាមេរិក និងអ៊ុយក្រែន៕