យោងតាមទីភ្នាក់ងារស្ទាបស្ទង់ភូគព្ភសាស្ត្រសហរដ្ឋអាមេរិក (USGS) បានឱ្យដឹងថា គ្រោះរញ្ជួយដីដ៏ខ្លាំងក្លាកម្រិត ៦,៦រ៉ិចទ័រ បានវាយប្រហារលើកោះមួយនៅឆ្នេរសមុទ្រស៊ូម៉ាត្រា ភាគខាងលិចប្រទេសឥណ្ឌូនេស៊ី ក្នុងថ្ងៃព្រហស្បតិ៍ ទី២៧ ខែវិច្ឆិកា នេះ។ USGS បាននិយាយថា រញ្ជួយដីដ៏ខ្លាំងនេះបានវាយប្រហារកោះ Simeulue នៅម៉ោងក្នុងស្រុកអំឡុងពេលព្រឹក នៅជម្រៅ ២៥គីឡូម៉ែត្រ។

ទន្ទឹមនឹងនេះ អាជ្ញាធរនៅទីភ្នាក់ងារឧតុនិយម អាកាសធាតុ និងភូគព្ភសាស្ត្ររបស់ឥណ្ឌូនេស៊ី (BMKG) បាននិយាយថា ការរញ្ជួយដីនេះកើតនៅក្បែរខេត្ត Aceh លើកោះស៊ូម៉ាត្រា ហើយមានជម្រៅរាក់ប្រហែល ១០គីឡូម៉ែត្រប៉ុណ្ណោះ ដែលធ្វើឱ្យសហគមន៍តាមតំបន់ឆ្នេរ និងដីគោក រងការរង្គើយ៉ាងខ្លាំង ប៉ុន្តែពុំមានការគំរាមកំហែងពីរលកយក្សស៊ូណាមិនោះទេ។

រហូតមកដល់ពេលនេះ មិនទាន់មានការខូចខាត អ្នកស្លាប់ឬរងរបួសនៅឡើយទេ។ ឥណ្ឌូនេស៊ី ស្ថិតនៅលើ "តំបន់កងភ្លើងប៉ាស៊ីហ្វិក" ដែលតែងតែជួបប្រទះរញ្ជួយដីក្នុងកម្រិតខុសៗគ្នាជាច្រើន។

គ្រោះរញ្ជួយដីនៅថ្ងៃព្រហស្បតិ៍នេះ កើតឡើងនៅក្នុងគ្រាដ៏លំបាកមួយរួចទៅហើយសម្រាប់ខេត្ត Aceh និងតំបន់ជុំវិញនោះលើកោះស៊ូម៉ាត្រា ដែលទើបតែជួបប្រទះគ្រោះធម្មជាតិនាពេលថ្មីៗនេះ រួមទាំងទឹកជំនន់ និងបំណាក់ដីយ៉ាងធ្ងន់ធ្ងរផងដែរ៕