​ប៉ូឡូញ៖ រដ្ឋមន្ត្រី​ការពារ​ជាតិ​អាមេរិកលោក Lloyd Austin បាន​មក​ពិនិត្យ​កងទ័ព​សហរដ្ឋអាមេរិក និង​ប៉ូឡូញក្នុងប្រទេស​ប៉ូឡូញ​កាលពី​ថ្ងៃ​សុក្រក្នុងការ​បង្ហាញ​សាមគ្គីភាព​ជាមួយ​សម្ព័ន្ធ​មិត្ត​ណា​តូ ក្នុងពេល​មាន​ភាព​តានតឹង​កាន់តែខ្លាំង​ឡើង​រវាង​ប្រទេសអ៊ុយ​ក្រែ​ន និង​រុស្ស៊ី​។ ​លោក Austin បាន​ជួប​ជាមួយ​កងទ័ព​នៅ​មូលដ្ឋាន Powidz ភាគ​ខាងលិច​ប្រទេស​ប៉ូឡូញ​។

លោក Austin និយាយថា នៅពេលណា​ក៏ដោយ​ដែល​យើង​ដាក់​ទាហាន​អាមេរិក​នៅ​កន្លែង​ណាមួយ វា​បង្ហាញ​ពី​ការតាំង​ចិត្ត​ក្នុង​ដំណោះស្រាយ​របស់​យើង​។ ​នៅក្នុង​ទីក្រុង Warsaw លោក Austin បាន​និយាយថា សហរដ្ឋអាមេរិក​មានផែន​ការលក់​រថក្រោះ​ប្រយុទ្ធ Abrams ចំនួន ២៥០គ្រឿង​ទៅឱ្យ​ប្រទេស​ប៉ូឡូញ​។​ ​ក្នុងអំឡុង​ដំណើរ​ទស្សនកិច្ច​ទៅកាន់​ទីក្រុង Warsaw លោក Austin និយាយថា សហរដ្ឋ​អាមេរិក​បាន​ប្តេជ្ញាចិត្ត​ចំពោះ​មាត្រា​ទី៥ របស់​អង្គការ​ណា​តូដែល​ធានាថា សម្ព័ន្ធភាព​នឹងមក​ការពារ​សមាជិក​ណាមួយ​របស់ខ្លួន​ដែល​ត្រូវបាន​គេ​វាយប្រហារ​។ បន្ទាប់ពី​ការ​លុកលុយ​របស់រុស្ស៊ី​ចូលទៅក្នុង​ប្រទេស​អ៊ុយ​ក្រែ​ន​ក្នុង​ឆ្នាំ២០១៤ សហរដ្ឋអាមេរិកបានដាក់​ពង្រាយ​ទាហាន​ជាង ៤,០០០នាក់​ទៅកាន់​ប្រទេស​ប៉ូឡូញ​ក្នុង​មូលដ្ឋាន​ផ្លាស់ប្តូរ​។ ​លោក Austin និយាយថា បន្ទាប់ពី​ការបង្កើន​កងទ័ព​រុស្ស៊ីនាពេល​ថ្មីៗ​នេះនៅ​ជិត​ព្រំដែនប្រទេស​អ៊ុយ​ក្រែ​ន សហរដ្ឋអាមេរិក​បាន​បញ្ជូនទាហាន ៤,៧០០បន្ថែមទៀត​ទៅកាន់​ប្រទេស​ប៉ូឡូញ៕

អត្ថបទ៖ ប៊ុនថន