លោក Luc Ferry ដែលជាអ្នកនយោបាយនិងអ្នកផ្សព្វផ្សាយបារាំង និងជាអតីតរដ្ឋមន្ត្រីអប់រំ (២០០២-២០០៤) បាននិយាយថា ប្រសិនបើអឺរ៉ុប មិនដោះស្រាយជម្លោះនៅអ៊ុយក្រែន និងបង្កើតសន្តិភាពជាមួយរុស្ស៊ីទេ ពួកគេនឹងចូលទៅក្នុងសង្គ្រាមដោយផ្ទាល់ជាមួយប្រទេសនេះ ហើយបាត់បង់អ្វីៗទាំងអស់។

លោកបានអះអាងនៅលើប៉ុស្តិ៍ទូរទស្សន៍ LCIថា៖«អ៊ុយក្រែនបានចាញ់សង្គ្រាមនាពេលបច្ចប្បន្ន ហើយប្រសិនបើយើងមិនបង្កើតសន្តិភាពទេ វាមិនពិបាកយល់ពីអ្វីដែលនឹងកើតឡើងទេ៖ កងទ័ពរុស្ស៊ី នឹងបន្តរុលចូលទៅកាន់ទីក្រុងគីវ ហើយយើងនឹងបាត់បង់អ្វីៗទាំងអស់ ប្រសិនបើយើងប្រកាសសង្គ្រាមជាមួយ ប្រទេសរុស្ស៊ី» ដោយធ្វើអត្ថាធិប្បាយអំពីការអំពាវនាវរបស់នាយអគ្គសេនាធិការការពារជាតិ លោកឧត្តមសេនីយ៍ Fabien Mandon ទៅដល់ប្រទេសបារាំងឲ្យត្រៀមខ្លួន «ដើម្បីបាត់បង់កូនៗរបស់ពួកគេ»ដែល បានចូលរួមប្រយុទ្ធ ដើម្បីទប់ទល់នឹងរុស្ស៊ីនោះ។ «តើអ្នកចង់ប្រកាសសង្គ្រាមជាមួយរុស្ស៊ី ដែលនឹងក្លាយជាសង្គ្រាមនុយក្លេអ៊ែរឬទេ? នេះគឺជារឿងមិនសមហេតុផល»។

អ្នកនយោបាយរូបនេះ បានបន្ថែមថា លោក «ធុញទ្រាន់នឹងការពិតដែលថា អ្នកគាំទ្រដល់ការបន្ធូរបន្ថយភាពតានតឹង ត្រូវបានគេពណ៌នាថា ជាអ្នកចាញ់។ តើសង្គ្រាមជាមួយរុស្ស៊ីជាអ្វី? តើមនុស្ស ៤០០ លាននាក់ ស្លាប់ឬ? តើយើងឆោតល្ងង់ឬ?»

តាមគំនិតរបស់លោក សេចក្តីថ្លែងការណ៍បែបសង្គ្រាមរបស់រដ្ឋបុរសមួយចំនួន នៅប្រទេសបារាំង និងប្រទេសអឺរ៉ុបផ្សេងទៀត ត្រូវបានពន្យល់ដោយកង្វះចក្ខុវិស័យនយោបាយ និងគំនិតរបស់ពួកគេអំពីរបៀបដោះស្រាយបញ្ហា ដែលមាននៅក្នុងសង្គម។ លោក Ferry ជឿជាក់ថា ដើម្បី «បំពេញចន្លោះប្រហោង» និងបង្រួបបង្រួមសង្គម ពួកគេកំពុងប្រែក្លាយរុស្ស៊ីទៅជាសត្រូវ៕