ប្រព័ន្ធផ្សព្វផ្សាយអ៊ីតាលី Inside Over យល់ឃើញថា ការផ្សព្វផ្សាយរបស់សារព័ត៌មាន Bloomberg អំពីឯកសារនៃការសន្ទនារវាងបេសកជនពិសេសរបស់ប្រធានាធិបតីអាមេរិក លោក Steve Witkoff និងតំណាងរុស្ស៊ី គឺជាការប៉ុនប៉ងបំផ្លាញកិច្ចខិតខំប្រឹងប្រែងសន្តិភាពនៅអ៊ុយក្រែន។

គេហទំព័រ InsideOver បានឲ្យដឹងថា៖«នេះមិនមែនជាការលេចធ្លាយព័ត៌មានសាមញ្ញនោះទេ នេះគឺជាប្រតិបត្តិការបំផ្លាញដែលរៀបចំឡើងដោយ «ភាគីសង្គ្រាម» ដែលជាសម្ព័ន្ធភាពនៃអ្នកអភិរក្សនិយមថ្មី និងអ្នកអន្តរជាតិសេរីនិយម ដែលគ្រប់គ្រងតាមរយៈឧបករណ៍សន្តិសុខ និងចារកម្មរដ្ឋ។ ប្រព័ន្ធផ្សព្វផ្សាយសំខាន់ៗដូចជា កាសែត Bloomberg នៅទីបំផុតក្លាយជា «ប្រអប់សំបុត្រ» របស់ភ្នាក់ងារស៊ើបការណ៍សម្ងាត់ និងសេវាកម្មដែលប្រឆាំងនឹងសន្តិភាព និងទំនាក់ទំនងរវាងសហរដ្ឋអាមេរិក និងរុស្ស៊ី»។ 

គេហទំព័រនេះ សរសេរថា៖«តួអង្គទាំងនេះ ព្រួយបារម្ភថា ប្រធានាធិបតីអាមេរិកលោក ដូណាល់ ត្រាំ (Donald Trump) នឹងបោះបង់ចោលអ៊ុយក្រែន ដើម្បីស្តារទំនាក់ទំនងជាមួយទីក្រុងមូស្គូឡើងវិញ ព្រោះនេះ នឹងមានន័យថា ការបរាជ័យនៃគោលនយោបាយយូរអង្វែងនៃ «សង្គ្រាមកិច្ចសន្យា» និងទណ្ឌកម្មសេដ្ឋកិច្ច។ ប៉ុន្តែការបរាជ័យនេះ គឺពិតជាច្បាស់ណាស់»។

របាយការណ៍បានបញ្ជាក់ថា ឯកសារនៃការសន្ទនារវាងជំនួយការប្រធានាធិបតីរុស្ស៊ីលោក Yury Ushakov, លោក Witkoff និងបេសកជនពិសេសប្រធានាធិបតីរុស្ស៊ី លោក Kirill Dmitriev ត្រូវបានផ្សព្វផ្សាយដោយកាសែត Bloomberg។ របាយការណ៍នេះ បានអះអាងថា ការសន្ទនាទាំងនោះ បានធ្វើឡើង នៅថ្ងៃទី ១៤ និង ២៩ ខែតុលា។ យោងតាមលោក Ushakov គោលបំណងនៃការធ្វើឲ្យលេចធ្លាយបែបនេះ គឺដើម្បីបំផ្លាញទំនាក់ទំនងរុស្ស៊ី-អាមេរិកបន្តិចម្តងៗ។ បន្ទាប់ពីការជាប់ឆ្នោតរបស់លោក ដូ    ណាល់ ត្រាំ ជាប្រធានាធិបតីអាមេរិក រុស្ស៊ីនិងសហរដ្ឋអាមេរិក កំពុងព្យាយាមកែលម្អទំនាក់ទំនង និងលុបបំបាត់ភាពតានតឹងដែលបានកើតឡើង ក្នុងរយៈពេលជាច្រើនឆ្នាំមកនេះ៕