ក្រុមមន្ត្រីនៅទីក្រុង Kunming ភាគនិរតីនៃប្រទេសចិន បាននិយាយថា រថភ្លើងមួយគ្រឿង បានបើកបុកកម្មករធ្វើការលើផ្លូវដែកមួយក្រុម នៅថ្ងៃព្រហស្បតិ៍ (២៧ វិច្ឆិកា) នេះ ដោយបានសម្លាប់មនុស្ស ១១នាក់ និងរងរបួស ២នាក់ ដែលជាគ្រោះថ្នាក់ផ្លូវដែកដ៏អាក្រក់បំផុតក្នុងរយៈពេលជាង ១ទសវត្សរ៍។

ក្រុមមន្ត្រីបាននិយាយថា រថភ្លើងដែលកំពុងសាកល្បងឧបករណ៍រាវរកការរញ្ជួយដីនោះ បានបុកកម្មករនៅលើផ្នែកកោងនៃផ្លូវ នៅស្ថានីយ៍រថភ្លើង Luoyang Town នៃទីក្រុង។ នៅក្នុងសេចក្តីថ្លែងការណ៍មួយ មន្រ្តីបានលើកឡើងថា ស្ថានីយក្នុងខេត្ត Yunnan មួយនេះ បានដំណើរការឡើងវិញជាធម្មតា ហើយមូលហេតុនៃគ្រោះថ្នាក់ កំពុងត្រូវស៊ើបអង្កេត។

បណ្តាញផ្លូវដែករបស់ចិន គឺជាបណ្តាញផ្លូវដែកដ៏ធំបំផុតរបស់ពិភពលោក ដែលលាតសន្ធឹងជាង ១៦០.០០០ គីឡូម៉ែត្រ និងមានការធ្វើដំណើររាប់ពាន់លានដំណើរក្នុងមួយឆ្នាំៗ។ ទោះបីជាមានការកើតសរសើរចំពោះប្រសិទ្ធភាពក៏ដោយ ក៏បណ្ដាញផ្លូវដែករបស់ចិន បានទាក់ទាញការត្រួតពិនិត្យ បន្ទាប់ពីឧប្បត្តិហេតុធំៗជាច្រើនដូចជា គ្រោះថ្នាក់កាលពីឆ្នាំ២០១១ នៅខេត្ត Zhejiang ភាគខាងកើត ដែលបានសម្លាប់មនុស្ស ៤០នាក់ និងរបួស ២០០នាក់៕