យោងតាមសេចក្តីរាយការណ៍សារព័ត៌មានបានឲ្យដឹងថា ការវាយប្រហារយានដ្រូនលើវាលឧស្ម័ន Khor Mor ស្ថិតនៅតំបន់ភាគខាងជើងអ៊ីរ៉ាក់ បានបង្ខំឲ្យរោងចក្រផ្អាកប្រតិបត្តិការ កាត់ផ្តាច់ថាមពលនៅទូទាំងតំបន់ Kurdish ។

ទីភ្នាក់ងារព័ត៌មានរ៉យទ័រ រាយការណ៍ថា ការវាយប្រហារនេះ បានកើតឡើងកាលពីយប់ថ្ងៃពុធ កាលពីវេលាម៉ោង ១១ និង ៣០នាទីយប់ ម៉ោងក្នុងស្រុក ។ យានដ្រូនបានវាយប្រហារត្រូវសឺទែនស្តុកឧស្ម័នជាច្រើន បណ្តាលមានការផ្ទុះ និងបង្កជាអគ្គិភ័យទ្រង់ទ្រាយធំ ហើយនិងធ្វើឲ្យកម្មករជាច្រើននាក់ រងរបួស ។ ពុំមានគ្រោះថ្នាក់ដល់អាយុជីវិត ត្រូវបានរាយការណ៍នោះទេ ។

យោងតាមការអះអាងរបស់បញ្ជាការប្រតិបត្តិការចម្រុះដែលជាបញ្ជាការយោធាកណ្តាលរបស់អ៊ីរ៉ាក់ បានឲ្យដឹងថា ការផ្តោតសំខាន់នៃការវាយប្រហារនេះ គឺដើម្បីបង្អាក់សន្តិសុខ និងស្ថិរភាពសេដ្ឋកិច្ចក្នុងតំបន់ ។

យោងតាមការអះអាងរបស់ក្រុមមន្រ្តី បានឲ្យដឹងថា ៨ភាគរយនៃបណ្តាញអគ្គិសនីក្នុងតំបន់ បានរងផលប៉ះពាល់ បណ្តាលឲ្យកាត់ផ្តាច់ថាមពលនៅទូទាំងតំបន់ពាក់កណ្តាលស្វយ័តមួយនេះ ។

វាលឧស្ម័ន Khor Mor ប្រតិបត្តិការដោយក្រុមហ៊ុនអារ៉ាប់រួម Dana Gas ហើយស្ថិតនៅចម្លោះទីក្រុង Kirkuk និងទីក្រុង Sulaimaniyah នៅភាគខាងជើងអ៊ីរ៉ាក់ ។

យោងតាមសេចក្តីរាយការណ៍របស់ទីភ្នាក់ងារ AFP បានឲ្យដឹងថា ក្រុមវិស្វករវាលឧស្ម័ន និយាយថា សឺទែនឧស្ម័នត្រូវការពេល ២-៣ថ្ងៃ ដើម្បីជួសជុលវា ខណៈរដ្ឋាភិបាលអ៊ីរ៉ាក់ និងក្រុមហ៊ុន Dana Gas បានបញ្ជូនក្រុមការងាររបស់ខ្លួន ដើម្បីស៊ើបអង្កេតលើឧបទ្ទេវហេតុមួយនេះ ។

នៅពុំមានភាគីណាមួយប្រកាសទទួលស្គាល់ការវាយប្រហារខាងលើឡើយ បើទោះបីជាវាលឧស្ម័ននៅតំបន់ Kurdish ធ្លាប់រងការវាយប្រហារយានដ្រូនដ៏អាថ៌កំបាំងកាលពីមុនក៏ដោយ ៕