ទីភ្នាក់ងារកុមាររបស់អង្គការសហប្រជាជាតិ ឬអង្គការយូនីសេហ្វ (UNICEF) កាលពីថ្ងៃពុធ (ទី២៦ ខែវិច្ឆិកា) បានឲ្យដឹងថា កុមារនៅក្នុងប្រទេសលីបង់ នៅតែបន្តប្រឈមនឹងអំពើហិង្សា និងការភ័យខ្លាច បើទោះបីជាមានកិច្ចព្រមព្រៀងបទឈប់បាញ់ត្រូវបានឈានដល់ជាមួយអ៊ីស្រាអែលកាលពីឆ្នាំមុនក៏ដោយ។

នៅក្នុងសេចក្តីថ្លែងការណ៍មួយ ដោយដកស្រង់តួលេខពីក្រសួងសុខាភិបាលលីបង់ តំណាងអង្គការយូនីសេហ្វ នៅលីបង់ លោក Marcoluigi Corsi បានលើកឡើងថា៖ «ការវាយប្រហារបណ្ដាលឲ្យមានមនុស្សបាត់បង់ជីវិត នៅតែបន្តគំរាមកំហែងដល់កុមារ នៅក្នុងប្រទេសលីបង់។ សោកនាដកម្មទាំងនេះ បានបន្ថែមចំនួនអ្នកស្លាប់ដ៏គួរឲ្យតក់ស្លុត ដោយកុមារមិនក្រោម ១៣នាក់ ត្រូវបានសម្លាប់ ហើយ ១៤៦នាក់ផ្សេងទៀតរងរបួស ចាប់តាំងពីបទឈប់បាញ់ត្រូវបានប្រកាសកាលពីមួយឆ្នាំមុន»។

លោក Corsi បានបន្ថែមថា៖ «នៅទូទាំងប្រទេសលីបង់ កុមារបន្តប្រឈមនឹងអំពើហិង្សា និងការភ័យខ្លាច សូម្បីតែក្នុងអំឡុងពេលមានបទឈប់បាញ់នេះ។ នេះជាអ្វីដែលមិនអាចទទួលយកបានឡើយ។ កុមារគ្រប់រូបមានសិទ្ធិធំធាត់ឡើងប្រកបដោយសុវត្ថិភាព ទទួលបានការការពារ និងរួចផុតពីគ្រោះថ្នាក់ផ្សេងៗ»។

សេចក្តីថ្លែងការណ៍របស់អង្គការយូនីសេហ្វនេះ កើតមានឡើងនៅមុនថ្ងៃគម្រប់ឆ្នាំដំបូងនៃបទឈប់បាញ់ រវាងអ៊ីស្រាអែល និងក្រុមហេសបូឡាដែលគាំទ្រដោយអ៊ីរ៉ង់។ កិច្ចព្រមព្រៀងនេះ បានចូលជាធរមានកាលពីថ្ងៃទី២៧ ខែវិច្ឆិកា ឆ្នាំ២០២៤ ហើយត្រូវបានគេសន្មត់ថា នឹងបញ្ចប់អរិភាពជាងមួយឆ្នាំ ក្នុងនោះរួមទាំងសង្រ្គាមពេញបន្ទុក ២ខែ រវាងអ៊ីស្រាអែល និងក្រុមហេសបូឡាផងដែរ។

តែអ៊ីស្រាអែលបានបន្តកំណត់គោលដៅលើសមាជិករបស់ក្រុមនេះ ដោយធ្វើការវាយប្រហារស្ទើររាល់ថ្ងៃ ហើយក៏បន្តកាន់កាប់ផងដែរលើទីតាំង ៥កន្លែង នៅភាគខាងត្បូងលីបង់៕