ក្រសួងការពារជាតិចិន នៅថ្ងៃព្រហស្បតិ៍ (ទី២៧ ខែវិច្ឆិកា) នេះ បានលើកឡើងថា ជប៉ុននឹងត្រូវទទួលបាន «ផលតបវិញយ៉ាងឈឺចាប់» ប្រសិនបើខ្លួនឈានចូលបន្ទាត់ ទាក់ទងនឹងបញ្ហាកោះតៃវ៉ាន់ ដោយនេះជាការឆ្លើយតបទៅនឹងផែនការរបស់ប្រទេសនេះ ក្នុងការដាក់ពង្រាយមីស៊ីល នៅលើកោះមួយដែលមានចម្ងាយប្រមាណជា ១០០គីឡូម៉ែត្រ ពីឆ្នេរសមុទ្រកោះតៃវ៉ាន់។

ការកត់សម្គាល់នេះបានកើតឡើង ស្របពេលមានវិបត្តិការទូតដ៏អាក្រក់បំផុតជាលើកដំបូង រវាងប្រទេសទាំង២ ក្នុងរយៈពេលជាច្រើនឆ្នាំមកនេះ បន្ទាប់ពីនាយករដ្ឋមន្ត្រីជប៉ុន លោកស្រី Sanae Takaichi បាននិយាយនៅខែនេះថា ការវាយប្រហាររបស់ចិន លើកោះតៃវ៉ាន់ អាចបង្កឲ្យមានការឆ្លើយតបផ្នែកយោធាពីទីក្រុងតូក្យូ។

ហើយកាលពីថ្ងៃអាទិត្យចុងសប្ដាហ៍កន្លងមក រដ្ឋមន្ត្រីការពារជាតិជប៉ុន លោក Shinjiro Koizumi បាននិយាយថា ផែនការកំពុង «ដំណើរការឆ្ពោះទៅមុខជានិច្ច» ក្នុងការដាក់ពង្រាយអង្គភាពមីស៊ីលបាញ់ពីដីទៅអាកាសរយៈចម្ងាយមធ្យម នៅមូលដ្ឋានយោធាមួយលើកោះ Yonaguni ដែលជាកោះមានចម្ងាយប្រហែល ១១០គីឡូម៉ែត្រ ពីឆ្នេរសមុទ្រភាគខាងកើតរបស់កោះតៃវ៉ាន់។

នៅពេលត្រូវបានសួរ អំពីការដាក់ពង្រាយដែលក្រសួងការបរទេសចិន បានរិះគន់រួចហើយនោះ ក្រសួងការពារជាតិរបស់ប្រទេសនេះ បានបញ្ជាក់ថា របៀប «ដោះស្រាយបញ្ហាកោះតៃវ៉ាន់» គឺជាកិច្ចការរបស់ចិន ហើយគ្មានអ្វីពាក់ព័ន្ធនោះឡើយជាមួយជប៉ុនដែលធ្លាប់បានគ្រប់គ្រងកោះតៃវ៉ាន់ពីឆ្នាំ១៨៩៥ រហូតដល់ចុងបញ្ចប់នៃសង្គ្រាមលោកលើកទី២ ក្នុងឆ្នាំ១៩៤៥។

អ្នកនាំពាក្យ លោក Jiang Bin បានប្រាប់សន្និសីទសារព័ត៌មានប្រចាំថ្ងៃថា៖ «មិនត្រឹមតែប្រទេសជប៉ុនមិនបានឆ្លុះបញ្ចាំងឲ្យស៊ីជម្រៅ អំពីឧក្រិដ្ឋកម្មដ៏ធ្ងន់ធ្ងរនៃការឈ្លានពាន និងការគ្រប់គ្រងអាណានិគមរបស់ខ្លួនលើកោះតៃវ៉ាន់ប៉ុណ្ណោះទេ តែផ្ទុយទៅវិញ ប្រទេសនេះ ដោយផ្គើននឹងទស្សនៈរបស់ពិភពលោក បែរជាគិតមានអន្តរាគមន៍យោធា នៅច្រកសមុទ្រតៃវ៉ាន់»។

លោកបានបន្ថែមថា៖ «កងទ័ពរំដោះប្រជាជន មានសមត្ថភាពខ្លាំងក្លា និងមធ្យោបាយដែលអាចទុកចិត្តបាន ក្នុងការកម្ចាត់សត្រូវឈ្លានពានណាមួយ។ ប្រសិនបើភាគីជប៉ុនហ៊ានឆ្លងកាត់ខ្សែបន្ទាត់ សូម្បីតែពាក់កណ្តាលជំហាន ហើយនាំបញ្ហាមកដាក់ខ្លួននោះ ការទទួលបានផលដ៏ឈឺចាប់ នឹងកើតមានដោយចៀសមិនរួចឡើយ»៕