គណបក្សរបស់អតីតនាយករដ្ឋមន្ត្រីប៉ាគីស្ថាន គឺលោក Imran Khan ដែលកំពុងជាប់ពន្ធនាគារ នៅថ្ងៃព្រហស្បតិ៍ (ទី២៧ ខែវិច្ឆិកា) នេះ បានទាមទារឲ្យមានការចូលជួបជាមួយលោក ដោយនិយាយថា បក្សមានក្ដីបារម្ភ អំពីសុខភាពរបស់លោក ខណៈដែលរូបលោកត្រូវបានរារាំងមិនឲ្យគ្រួសារ និងមេធាវីរបស់លោកចូលសួរសុខទុក្ខ អស់រយៈពេលជាង ៣សប្តាហ៍ហើយ។

គួរបញ្ជាក់ថា លោក Khan បានជាប់ពន្ធនាគារតាំងពីខែសីហា ឆ្នាំ២០២៣ មកម៉្លេះ ដោយបានអនុវត្តទោសរយៈពេល ១៤ឆ្នាំ ជុំវិញការចោទប្រកាន់ពីបទពុករលួយ ជាករណីមួយ ក្នុងចំណោមសំណុំរឿងជាច្រើនដែលលោកនិយាយថា ត្រូវបានរៀបចំឡើង ដើម្បីកុំឲ្យលោកចូលប្រឡូកក្នុងឆាកនយោបាយ ពីសំណាក់យោធា ជាការលើកឡើងដែលត្រូវបានបដិសេធ។

លោក Zulfikar Bukhari អ្នកនាំពាក្យនៃគណបក្ស Pakistan Tehreek-e-Insaf (PTI) របស់លោក Khan បាននិយាយថា គ្មាននរណាម្នាក់ បានជួបលោក Khan ឡើយ ចាប់តាំងពីថ្ងៃទី៤ ខែវិច្ឆិកា ហើយគ្មានហេតុផលណាមួយ ត្រូវបានផ្តល់ឲ្យនោះទេ ជុំវិញការមិនឲ្យចូលជួបនេះ។ លោក Khan កំពុងត្រូវបានបដិសេធមិនឲ្យចូលជួបសួរសុខទុក្ខ និងការផ្ដល់ជំនួយផ្នែកវេជ្ជសាស្រ្ដ បើទោះបីជាលោកមានឋានៈជាអតីតនាយករដ្ឋមន្ត្រីក្ដី។

ដោយទាមទារឲ្យរដ្ឋាភិបាលអនុញ្ញាតឲ្យគ្រួសាររបស់លោក Khan ចូលទៅជួបរូបលោកជាបន្ទាន់នោះ លោក Bukhari បានប្រាប់សារព័ត៌មាន Reuters ថា៖ «សុខភាពរបស់គាត់ គឺជាក្ដីកង្វល់របស់យើង។ យើងព្រួយបារម្ភអំពីការដាក់ឲ្យនៅដាច់ពីគេឯងដោយខុសច្បាប់»។

ច្បាប់ពន្ធនាគារអនុញ្ញាតឲ្យលោក Khan ជួបអ្នកខាងក្រៅយ៉ាងតិចម្តង ក្នុងមួយសប្តាហ៍ តែអាជ្ញាធរពន្ធនាគារ អាចផ្អាកសិទ្ធិបែបនេះ។ គណបក្សបានបន្ថែមថា មានរយៈពេលយូរដល់រាប់សប្តាហ៍ហើយ នៅពេលដែលលោក Khan មិនត្រូវបានអនុញ្ញាតឲ្យជួបជាមួយអ្នកក្រៅ៕