ក្រុមអាជ្ញាធរហុងកុងបាននិយាយនៅថ្ងៃសុក្រ ២៨ វិច្ឆិកាសប្ដាហ៍នេះ ថា ចំនួនអ្នកស្លាប់ដោយសារអគ្គិភ័យដ៏អាក្រក់បំផុតរបស់ទីក្រុងក្នុងរយៈពេលជាច្រើនទសវត្សរ៍បានកើនឡើងដល់យ៉ាងហោចណាស់ ៩៤នាក់ ដោយអណ្ដាតភ្លើងស្ទើរតែរលត់ទាំងស្រុង ហើយក្រុមជួយសង្គ្រោះកំពុងរុករកក្នុងអគារខ្ពស់ៗត្រូវបានឆេះ ដើម្បីស្វែងរកមនុស្ស២៧៩នាក់ដែលនៅតែបាត់ខ្លួន។ 

នៅព្រឹកថ្ងៃសុក្រនេះ ក្រុមអាជ្ញាធរបាននិយាយថា អគ្គិភ័យត្រូវបានគ្រប់គ្រងក្នុងអគារអឹផាតមិនចំនួនបួនក្នុងចំណោមផ្នែកនៃអគារអឹផាតមិនជិត ២.០០០កន្លែង ជាង២៤ ម៉ោងបន្ទាប់ពីអគ្គិភ័យបានផ្ទុះឡើងកាលពីពុធសប្ដាហ៍នេះ ក្នុងប្លុកដែលមានអគារខ្ពស់ៗចំនួនប្រាំបី។

អ្នកនាំពាក្យរដ្ឋាភិបាលមួយរូបបាននិយាយថា យ៉ាងហោចណាស់មានមនុស្ស ៧៦ នាក់បានរងរបួសនៅក្នុងអគ្គិភ័យនេះ រួមទាំងអ្នកពន្លត់អគ្គិភ័យចំនួន ១១ នាក់។ មនុស្សជាច្រើននៅតែបាត់ខ្លួន ទោះបីជាចំនួនពិតប្រាកដមិនទាន់ត្រូវបានធ្វើបច្ចុប្បន្នភាពចាប់តាំងពីព្រឹកថ្ងៃព្រហស្បតិ៍ក៏ដោយ។

ក្រុមអាជ្ញាធរបានចាប់ផ្តើមស៊ើបអង្កេតពីមូលហេតុបង្កឱ្យមានការឆាបឆេះនេះ ដែលជាអគ្គិភ័យដ៏អាក្រក់បំផុតរបស់មជ្ឈមណ្ឌលហិរញ្ញវត្ថុនេះក្នុងរយៈពេលជិត ៨០ ឆ្នាំ រួមទាំងវត្តមាននៃរន្ទាឫស្សី និងសំណាញ់ប្លាស្ទិករុំជុំវិញសំណង់ជាផ្នែកមួយនៃការជួសជុលឡើងវិញទូទាំងអចលនទ្រព្យមួយនេះ។

ស្ថាប័នប្រឆាំងអំពើពុករលួយហុងកុងនិយាយថា ខ្លួនបានចាប់ផ្តើមការស៊ើបអង្កេតលើការងារជួសជុលឡើងវិញក្នុងអគារលំនៅដ្ឋាននេះ ប៉ុន្មានម៉ោងបន្ទាប់នគរបាលនិយាយថា ពួកគេបានចាប់ខ្លួនបុរសបីនាក់ដោយសង្ស័យថាបានទុកគំនរឡាំងស្នោចោលដោយធ្វេសប្រហែសនៅកន្លែងអគ្គិភ័យ។

អ្នកស្រុកនៃសង្កាត់ Wang Fuk ដែលមានទីតាំងក្នុងស្រុក Tai Po ភាគខាងជើងនៃទីក្រុងហុងកុង បានប្រាប់សារព័ត៌មាន AFP ថា ពួកគេពុំបានឮសំឡេងប្រកាសអាសន្នអគ្គិភ័យទេ ហើយត្រូវទៅពីផ្ទះមួយទៅផ្ទះមួយដើម្បីជូនដំណឹងដល់អ្នកជិតខាងអំពីគ្រោះថ្នាក់នោះ៕