ប្រព័ន្ធផ្សព្វផ្សាយបានរាយការណ៍នៅថ្ងៃសុក្រ (២៨ វិច្ឆិកា) នេះថា ទឹកជំនន់យ៉ាងគំហុក និងបំណាក់ដីនៅលើកោះស៊ូម៉ាត្រា របស់ប្រទេសឥណ្ឌូនេស៊ី បានសម្លាប់មនុស្សចំនួន ៦៩នាក់ហើយ ជាមួយនឹងការបាត់ខ្លួន ៥៩នាក់ផ្សេងទៀត ខណៈបុគ្គលិកសង្គ្រោះបន្ទាន់កំពុងបន្តការស្វែងរកនៅក្នុងទន្លេ និងគំនរបាក់បែកនៃភូមិ ដើម្បីរកមើលសាកសព និងអ្នករួចជីវិត។

ភ្លៀងមូសុងកាលពីមួយសប្តាហ៍កន្លងទៅ បានធ្វើឱ្យទឹកទន្លេហូរហៀរបាក់ច្រាំងក្នុងខេត្តស៊ូម៉ាត្រាខាងជើង ក្នុងថ្ងៃអង្គារសប្ដាហ៍នេះ។ ទីភ្នាក់ងារគ្រប់គ្រងគ្រោះមហន្តរាយជាតិ បាននិយាយថា ការហៀរហូរបែបនេះបានបង្កជាទឹកជំនន់យ៉ាងគំហុក ជោរជន់លិចភូមិនៅតាមតំបន់ភ្នំជាច្រើន ដោយហូរនាំប្រជាជន និងលិចលង់ផ្ទះសម្បែង និងអគារជាង ២.០០០ខ្នង។ អ្នកស្រុកជិត ៥.០០០នាក់ បានជម្លៀសខ្លួនទៅកាន់ទីជម្រកបណ្ដោះអាសន្ន។

ក្រុមអ្នកជួយសង្គ្រោះជិះទូកតូចៗទៅស្វែងរកតាមដងទន្លេ ហើយជួយកុមារនិងមនុស្សចាស់ដែលជាប់គាំងនៅលើដំបូលផ្ទះ និងអគារលិចទឹក។ ក្រៅពីខេត្តស៊ូម៉ាត្រាខាងជើង ទីភ្នាក់ងារគ្រោះមហន្តរាយនិយាយថា គ្រោះទឹកជំនន់ក៏កើតឡើងនៅកន្លែងផ្សេងទៀតដែរក្នុងប្រទេសប្រជុំកោះដ៏ធំមួយនេះ រួមទាំងខេត្ត Aceh និងកោះស៊ូម៉ាត្រាខាងលិច ជាទីដែលលំនៅឋានរាប់ពាន់ខ្នងត្រូវជន់លិចដល់ដំបូល។

ទីភ្នាក់ងារកាត់បន្ថយគ្រោះមហន្តរាយខេត្ត Aceh បាននិយាយថា មនុស្សជិត ៤៧.០០០នាក់ ត្រូវជម្លៀសខ្លួនដោយទឹកជំនន់ក្នុងខេត្តនេះ។ អាជ្ញាធរក្នុងតំបន់និយាយថា ទឹកជំនន់នៅខេត្តស៊ូម៉ាត្រាខាងលិច បានលិចលង់ផ្ទះសម្បែងរាប់ពាន់ខ្នង រួមទាំងផ្ទះជាង ៣.៣០០ខ្នង ក្នុងស្រុក Padang Pariaman ដោយបង្ខំឱ្យប្រជាជនប្រហែល ១២.០០០នាក់ ត្រូវជម្លៀសខ្លួនទៅជម្រកបណ្តោះអាសន្ន៕