ក្រុមអាជ្ញាធរនៅភាគខាងត្បូងរបស់ប្រទេសថៃកំពុងត្រៀមទប់ស្កាត់បន្ថែមទៀត ខណៈចំនួនអ្នកស្លាប់បានកើនឡើងដល់ជាង ១០០ នាក់ហើយ គិតត្រឹមព្រឹកថ្ងៃសុក្រ២៨វិច្ឆិកាសប្ដាហ៍នេះ បន្ទាប់ពីទឹកជំនន់ដ៏មហន្តរាយបានជន់លិចមជ្ឈមណ្ឌលពាណិជ្ជកម្មដ៏សំខាន់របស់ទីក្រុងហាតយ៉ៃនៃខេត្តសុងក្លា ខណៈសម្ពាធនយោបាយកើនឡើងលើរដ្ឋាភិបាលឱ្យសូមទោសចំពោះការបរាជ័យក្នុងការឆ្លើយតបទៅនឹងគ្រោះមហន្តរាយរបស់ខ្លួន។

ខណៈទឹកជំនន់បានស្រកនៅទូទាំងក្រុងហាតយ៉ៃ និងតំបន់ជុំវិញនៃខេត្តសុងក្លា លោកឧត្តមសេនីយ៍ឯក ត្រៃរ៉ុង ភៀវផាន (Trairong Phiewphan) អគ្គស្នងការរងនគរបាលជាតិថៃ បានបង្ហាញថា ជនរងគ្រោះដែលបានស្លាប់សរុបចំនួន ១០៤ នាក់ត្រូវបានបញ្ជូនទៅកំណត់អត្តសញ្ញាណ គិតត្រឹមម៉ោង ៨:៣០ យប់ ម៉ោងក្នុងស្រុក ថ្ងៃទី ២៧ ខែវិច្ឆិកា សប្ដាហ៍នេះ។

សាកសពទាំងនោះបានមកពីមន្ទីរពេទ្យ និងតំបន់គ្រោះមហន្តរាយផ្សេងៗនៅក្នុងខេត្តសុងក្លា និងតំបន់ក្បែរៗនោះ។

កាលពីថ្ងៃព្រហស្បតិ៍ សប្ដាហ៍នេះដែរ កងកម្លាំងជើងទឹកថៃនៅតែបន្តដឹកជញ្ជូនស្បៀងអាហារនិងសម្ភារៈផ្គត់ផ្គង់សំខាន់ៗទៅកាន់ប្រជាពលរដ្ឋរបស់ខ្លួនដែលរងផលប៉ះពាល់ដោយទឹកជំនន់ធ្ងន់ធ្ងរ។

យោងតាមក្រសួងមហាផ្ទៃ ទឹកជំនន់បានបំផ្លិចបំផ្លាញផ្ទះសម្បែងជាង៩៨០.០០០ខ្នង និងបានប៉ះពាល់ដល់មនុស្ស២,៧ លាននាក់ក្នុងប្រទេសថៃ៕