ក្រសួងការបរទេសសហរដ្ឋអាមេរិក បានគាំទ្រផែនការដើម្បីបង្កើតអ្វីដែលខ្លួនហៅថា «សហគមន៍សុវត្ថិភាពជម្រើសថ្មី»(ASC) នៅក្នុងតំបន់ហ្កាហ្សា ជាផ្នែកមួយនៃផែនការរវាងសហរដ្ឋអាមេរិកនិងអ៊ីស្រាអែល ដែលទំនងជាបែងចែកតំបន់ហ៊ុមព័ទ្ធប៉ាឡេស្ទីនជាពីរ។

អ្នកនាំពាក្យក្រសួងការបរទេសបានបញ្ជាក់ប្រាប់សារព័ត៌មាន Al Jazeera ថា ខ្លួនគាំទ្រវិធីសាស្រ្ត «សហគមន៍សុវត្ថិភាពជម្រើសថ្មី»(ASC) ដោយនិយាយថា វាត្រូវបានគេមើលឃើញថាជាមធ្យោបាយដ៏មានប្រសិទ្ធភាពបំផុតដើម្បីសម្រេចបាន» គោលដៅនៃ «ការផ្លាស់ទីប្រជាជនទៅកាន់កន្លែងស្នាក់នៅដែលមានសុវត្ថិភាពឱ្យបានលឿនតាមដែលអាចធ្វើទៅបាន»។

ផែនការ«សហគមន៍សុវត្ថិភាពជម្រើសថ្មី» (ASC) បានលេចចេញជារូបរាងក្នុងរយៈពេលប៉ុន្មានសប្តាហ៍ថ្មីៗនេះ ជាផ្នែកមួយនៃការពិភាក្សាកាន់តែទូលំទូលាយដែលនឹងមើលឃើញតំបន់ហ្កាហ្សាបែងចែកទៅជា «តំបន់បៃតង»គ្រប់គ្រងដោយអ៊ីស្រាអែល និង«តំបន់ក្រហម» គ្រប់គ្រងដោយក្រុមហាម៉ាសប៉ាឡេស្ទីន។

មានភាពច្បាស់លាស់តិចតួចអំពីរបៀបដែលផែនការនេះនឹងដំណើរការ ហើយព័ត៌មានលម្អិតទំនងជានៅតែប្រែប្រួល ប៉ុន្តែមានការគូសបញ្ជាក់ទូលំទូលាយ ហើយយោងតាមការរាយការណ៍នៅក្នុងសារព័ត៌មាន The New York Times និងសារព័ត៌មានផ្សេងទៀត ការកសាងឡើងវិញនៅក្នុងតំបន់ហ្កាហ្សានឹងកើតឡើងតែនៅក្នុងតំបន់ដែលគ្រប់គ្រងដោយអ៊ីស្រាអែលប៉ុណ្ណោះ ពុំមែននៅក្នុងតំបន់ដែលក្រុមហាម៉ាសនៅតែធ្វើប្រតិបត្តិការនោះទេ។