មន្ត្រីបាននិយាយថា បំណាក់ដី និងទឹកជំនន់ ដែលបង្កឡើងដោយភ្លៀងធ្លាក់ខ្លាំងបានបណ្តាលឱ្យមនុស្សជាង ៤០ នាក់ស្លាប់ នៅក្នុងប្រទេសស្រីលង្កា ជាទីដែលក្រុមអាជ្ញាធរបានបញ្ឈប់រថភ្លើងដឹកអ្នកដំណើរ និងបិទផ្លូវនៅក្នុងតំបន់មួយចំនួននៃប្រទេសនេះ។

មជ្ឈមណ្ឌលគ្រប់គ្រងគ្រោះមហន្តរាយរបស់រដ្ឋាភិបាលកាលពីថ្ងៃព្រហស្បតិ៍ទី២៧វិច្ឆិកាសប្ដាហ៍នេះ បាននិយាយថា ក្នុងចំណោមអ្នកស្លាប់ដែលបានរាយការណ៍ មាន២៥ នាក់ នៅក្នុងតំបន់ភ្នំដំណាំតែ Badulla និង Nuwara Eliya នៅកណ្តាលប្រទេសស្រីលង្កា ចម្ងាយប្រហែល ៣០០ គីឡូម៉ែត្រ ភាគខាងកើតនៃរដ្ឋធានី កូឡុំបូ។

មជ្ឈមណ្ឌលនេះបាននិយាយថា មនុស្ស ២១ នាក់ផ្សេងទៀតបានបាត់ខ្លួនដោយសារតែបំណាក់ដីនៅក្នុងតំបន់ដូចគ្នា ខណៈមនុស្ស ១០ នាក់បានរងរបួស។    

ប្រទេសស្រីលង្កាបានចាប់ផ្តើមជួបប្រទះអាកាសធាតុអាក្រក់កាលពីសប្តាហ៍មុន ដែលកាន់តែធ្ងន់ធ្ងរដោយសារភ្លៀងធ្លាក់ខ្លាំងកាលពីចុងសប្តាហ៍ បង្កជាទឹកជំនន់បំផ្លិចបំផ្លាញផ្ទះសម្បែង វាលស្រែ និងផ្លូវថ្នល់។

ក្រុមមន្ត្រីបាននិយាយថា ទឹកក្នុងអាងស្តុកទឹក និងទន្លេនានា បានហៀរឡើងលិចផ្លូវថ្នល់ ហើយផ្លូវសំខាន់ៗមួយចំនួនដែលតភ្ជាប់ខេត្តនានាត្រូវបានបិទ។

គួររម្លឹកថាទឹកជំនន់ដ៏អាក្រក់បំផុតនៅសតវត្សរ៍នេះ គឺនៅក្នុងខែមិថុនា ឆ្នាំ ២០០៣ នៅពេលដែលមនុស្ស ២៥៤ នាក់បានស្លាប់៕