ភ្លៀងធ្លាក់ខ្លាំងជាច្រើនថ្ងៃនៅតំបន់ហ្កាហ្សាបានបន្ថែមទុក្ខវេទនាដល់ប្រជាជនប៉ាឡេស្ទីនកំពុងភៀសខ្លួនចេញពីទីលំនៅ ដែលប្រឹងតស៊ូនឹងទឹកជំនន់ អាកាសធាតុត្រជាក់ក្នុងរដូវរងា និងកង្វះខាតសម្ភារៈចាំបាច់យ៉ាងធ្ងន់ធ្ងរ។

នៅកណ្តាលតំបន់ហ្កាហ្សា ជំរំតង់សម្រាប់ជនស៊ីវិលដែលផ្លាស់ទីលំនៅត្រូវបានទឹកជន់លិច និងគ្របដណ្ដប់ដោយល្បាប់និងកម្ទេចដីក្រាស់ៗពេលទឹកស្រក។ពលរដ្ឋប៉ាឡេស្ទីនកំពុងប្រើសម្ភារៈងាយៗដើម្បីសាងសង់ទំនប់ដីជុំវិញតង់របស់ពួកគេ ការពារកុំឱ្យទឹកហូរចូល ដោយនិយាយថាពួកគេមិនអាចធ្វើអ្វីបានច្រើនទេក្នុងកាលៈទេសៈនេះ។

អ្នកស្រុកហ្កាហ្សាម្នាក់ឈ្មោះ Ahmad al-Baghdadi បានិយាយថាស្ថានភាពរបស់ពួកគេកាន់តែមិនអាចទ្រាំទ្របាន។ ពួកគេត្រូវបានទឹកជន់លិច ហើយគ្មានគ្រែសម្រាក ឬអ្វីដែលនៅសល់នៅក្នុងតង់នោះទេ ។ស្ថានភាពរបស់ពួកគេមិនមែនគ្រាន់តែជាសោកនាដកម្មនោះទេ តែវាកាន់តែអាក្រក់ខ្លាំង។

អង្គការសហប្រជាជាតិ និងបណ្ដាដៃគូរបស់ខ្លួន កំពុងធ្វើការដើម្បីកាត់បន្ថយវិបត្តិចុងក្រោយបង្អស់ រួមទាំងការច្រកដីខ្សាច់ក្នុងបាវដើម្បីទប់ទឹកជំនន់នៅក្នុងជំរំភៀសខ្លួន។

អង្គការសហប្រជាជាតិនិយាយថា ខ្លួនកំពុងធ្វើការតំណាងទៅកាន់ក្រុមអាជ្ញាធរអ៊ីស្រាអែល ដើម្បីដកការរឹតបន្តឹងលើការផ្គត់ផ្គង់ជំនួយសំខាន់ៗ ដែលជនស៊ីវិលនៅក្នុងតំបន់ហ្កាហ្សាត្រូវការជាចាំបាច់៕