ប្រធានាធិបតីរុស្ស៊ី លោក Vladimir Putin បានលើកឡើងកាលពីថ្ងៃព្រហស្បតិ៍ (២៧ វិច្ឆិកា) ថា រុស្ស៊ី បានត្រៀមខ្លួនរួចជាស្រេចហើយក្នុងការចូលរួមកិច្ចពិភាក្សាអំពីសន្តិសុខទ្វីបអឺរ៉ុប។ មេដឹកនាំរុស្ស៊ីរូបនេះបន្តថា ទីក្រុងមូស្គូ មិនមានគម្រោងវាយប្រហារបណ្តាប្រទេសអ៊ឺរ៉ុបទេ ដោយបន្ថែមថា ប្រសិនបើអឺរ៉ុប ចង់បានកិច្ចសន្យាលើរឿងនេះ រុស្ស៊ីក៏មានឆន្ទៈផ្តល់ឱ្យដែរ។

ថ្លែងក្នុងសម័យបើកកិច្ចប្រជុំកំពូលនៃអង្គការសន្ធិសញ្ញាសន្តិសុខសមូហភាព (CSTO) នៅទីក្រុងប៊ីស្កេក ប្រទេសកៀហ្ស៊ីស៊ីស្ថាន លោក Putin បាននិយាយថា "និយាយជារួម រុស្ស៊ីនឹងមិនវាយប្រហារអឺរ៉ុបទេ។ បែបនេះស្តាប់ទៅគួរឱ្យអស់សំណើច ប៉ុន្តែរុស្ស៊ីមិនដែលមានបំណងធ្វើរឿងនោះឡើយ។ ប្រសិនបើពួកគេចង់ឮការសន្យារឿងនេះពីរុស្ស៊ី នោះគួរតែសរសេរជាលាយលក្ខណ៍អក្សរទៅ គ្មានបញ្ហានោះទេ"។

លោកបន្តទៀតថា អ្នកដែលអះអាងថារុស្ស៊ី ជាការគម្រាមកំហែងដល់អឺរ៉ុប គឺ "សុទ្ធតែមានសតិមិនល្អ" ហើយអ្នកទាំងនោះ បម្រើផលប្រយោជន៍ដល់ឧស្សាហកម្មការពារជាតិ ក្រុមហ៊ុនឯកជន ឬកំពុងព្យាយាមបង្កើនកម្រិតនយោបាយក្នុងស្រុករបស់ខ្លួន ស្របពេលមានស្ថានភាពសេដ្ឋកិច្ចធ្ងន់ធ្ងរ។

គួរឱ្យដឹងថា ក្រុមមន្ត្រីអឺរ៉ុប តែងព្រមានម្តងហើយម្តងទៀតអំពីការគំរាមកំហែងនៃប្រតិបត្តិការយោធារបស់រុស្ស៊ី ប្រឆាំងនឹងអឺរ៉ុប។ កាលពីខែតុលាកន្លងទៅ ស្នងការការពារជាតិសហភាពអឺរ៉ុប លោក Andrius Kubilius បានសង្កត់ធ្ងន់ថា វិមានក្រឹមឡាំង កំពុងពិភាក្សារួចទៅហើយអំពីផែនការវាយប្រហារប្រទេសសមាជិកណាតូ៕