​បាល់ទាត់៖ ក្រុមបាល់ទាត់​ជម្រើសជាតិ​អាយុ​ក្រោម ២៣​ឆ្នាំ​កម្ពុជា​ត្រូវ​ចាំ​អ៊ុត​លទ្ធផល​ការប្រកួត​បញ្ច​ប់ពូ​ល C រវាង​វៀតណាម និង​ថៃ បន្ទាប់ពី​ភ្លាត់​ប្រកួត​ចាញ់​ក្រុម U23 ទី​ម័​រ​ខាងកើត ១-០ ក្នុង​ជំនួប​បញ្ចប់​ពូ​ល A នៃ​ពានរង្វាន់ AFF U23 Championship 2022 នៅ​ពហុ​កីឡដ្ឋាន​ជាតិ​មរតក​តេ​ជោ​កាលពី​យប់​ថ្ងៃ​ទី​២០ ខែ​កុម្ភៈ ឆ្នាំ​២០២២។​

​ជំនួប​ដ៏​តានតឹងដែលមាន​អ្នកទស្សនា​ផ្ទាល់ ២៥,៣០៧​នាក់​នេះ ទី​ម័​រ​ខាងកើតបាន​បើក​ការ​នាំមុខ​ក្រុម​គោព្រៃ​ជំទង់​កម្ពុជា ១​គ្រាប់​មុនតាមរយៈ​ការទា​ត់បា​ល់ពី​ចម្ងាយ​របស់​កីឡាករ Joao Bosco Halle នៅ​នាទី​១៨ ។ បន្ទាប់មក​កម្ពុជា​បាន​ព្យាយាម​វាយបក​វិញនៅ​វគ្គ​ទី​១ តែ​ធ្វើ​មិនបាន​សម្រេច​ឡើយនាំ​ឲ្យ​ទី​ម័​រ​ខាងកើតទទួលបាន ៣​ពិន្ទុ​បន្ថែម និង​ឡើងឈរ​កំពូល​តារាង​ពូ​ល A មាន ៧​ពិន្ទុដើម្បី​ឡើង​វគ្គ​ពាក់​កណ្ដាល​ផ្ដាច់ព្រ័ត្រ​តែម្ដង។​ ​ក្រោយ​ចប់​ការប្រកួត​លោក Ryu Hirose គ្រូបង្វឹក​ក្រុម U23 កម្ពុជាបានទទួល​ស្គាល់នេះ​គឺជា​ការប្រកួត​ដ៏​តានតឹង និង​ពិបាក​សម្រាប់​ក្រុម​ខ្លួនបើ​ធៀប​នឹង​ការប្រកួត ២​ប្រកួត​មុន ពោលគឺ​តាំងពី​ចាប់ផ្ដើម​វគ្គ​ទី​១ ក្រុមយុវជន​កម្ពុជាមិនអាច​រក្សា​ការ​អត់​ធ្ម​ត ក៏ដូចជា​មិនអាច​រក្សា​ការគ្រប់គ្រង​បាល់​បាន ផ្ទុយ​ពីអ្វី​ដែល​បានរៀបចំ។ លោក​ថា ក្រុម​ទាំងមូល​ត្រូវតែ​រៀន​យកឈ្នះ​ការប្រកួត​ដែល​សំខាន់​ដូច្នេះ ដើម្បី​ឡើងទៅ​វគ្គ​ផ្ដាច់ព្រ័ត្រ និង​ពានរង្វាន់​ផ្សេងៗ​ទៀត។​

​សូមបញ្ជាក់ថា ក្រោយ​របូត ៣​ពិន្ទុ​ដំបូង ក្នុង​ប្រកួត​ទី​៣ នៃ​ពូ​ល A គេ​មើលឃើញថា ក្រុម​គោព្រៃ​ជំទង់​កម្ពុជានៅសល់​ឱកាស​តិចតួច​ប៉ុណ្ណោះ ក្នុងការ​ប្រជែង​កៅអី​វគ្គ​ពាក់កណ្ដាល​ផ្ដាច់ព្រ័ត្រនៃ​ពានរង្វាន់ AFF U23 Championship 2022 ដោយ​ផ្អែកលើ​លទ្ធផល​ការប្រកួត​បញ្ច​ប់ពូ​ល C រវាង​ក្រុម U23 វៀតណាម និង​ថៃនា​ថ្ងៃទី​២២ ខែកុម្ភៈ​ស្អែក ហើយ​បើ​ក្រុម​ទាំងពីរប្រកួត​ស្មើគ្នា​វិញកម្ពុជា​នឹងត្រូវ​បាត់បង់​ឱកាស​មាស​នេះ​តែម្ដង។​ ​ចំពោះ​ក្រុម U23 កម្ពុជាមានឱកាស​ឡើង​វគ្គ​បន្ដ លុះត្រា​ការប្រកួត​រវាង​វៀតណាម និង​ថៃបញ្ចប់​ដោយ​លទ្ធផល​ឈ្នះ​-​ចាញ់ក្នុងនោះ​វៀតណាមអាច​ឈ្នះ​ថៃលើសពី ២​គ្រាប់​ឡើង ឬ​ថៃឈ្នះ​វៀតណាម​លើសពី ៧​គ្រាប់​ឡើង ព្រោះ​បើ​គិត​ពិន្ទុ​បណ្ដោះ​អាសន្នដើម្បី​ស្វែងរក​ក្រុម​លេខ​២ ល្អ​ជាងគេ​បច្ចុប្បន្នកម្ពុ​ជាមាន ៣​ពិន្ទុ តែ​គ្មាន​គ្រាប់​បាល់​ចំណេញ ផ្ទុយ​ពី​វៀតណាមដែលមាន ៣​ពិន្ទុ តែមាន​គ្រាប់​បាល់​ចំណេញ ៧​គ្រាប់ ហើយ​ថៃ​មាន ៣​ពិន្ទុ​ដូចគ្នា និង​មាន​គ្រាប់​បាល់​ចំណេញ ២​គ្រាប់។ តាមរយៈ​នេះហើយដែល​ធ្វើ​ឲ្យ​គេ​មើលឃើញថា កម្ពុជា​នៅសល់​ឱកាស​តិចតួច​ប៉ុណ្ណោះដើម្បី​ឡើង​វគ្គ​ពាក់កណ្ដាល​ផ្ដាច់ព្រ័ត្រ៕

​អត្ថបទ៖ លី ឈុន​ឡា