ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (២៧ វិច្ឆិកា) បានប្រកាសថា រដ្ឋបាលរបស់លោកនឹងផ្អាកអន្តោប្រវេសន៍ជាអចិន្ត្រៃយ៍ពី "បណ្ដាប្រទេសតតិយលោក" ទាំងអស់ ដើម្បីអនុញ្ញាតឱ្យប្រព័ន្ធរបស់អាមេរិក ស្ដារឡើងវិញឱ្យបានពេញលេញ។ ចំណាត់ការនេះកើតឡើងបន្ទាប់ពីការវាយប្រហារនៅជិតសេតវិមាន ដែលលោកសន្មត់ថា ជាការបរាជ័យក្នុងការត្រួតពិនិត្យអន្តោប្រវេសន៍សម័យរដ្ឋបាលអតីតប្រធានាធិបតី Joe Biden ។

លោក Trump ពុំបានកំណត់ឈ្មោះប្រទេសណាមួយឡើយ ហើយក៏មិនបានបកស្រាយដែរថា តើលោកចង់មានន័យបែបណា ទាក់ទងនឹងប្រទេសតតិយលោក ឬ "ការផ្អាកជាអចិន្ត្រៃយ៍" នោះ។ លោកគ្រាន់តែនិយាយថា ផែនការនេះនឹងរួមបញ្ចូលករណីអន្តោប្រវេសន៍ ដែលអនុម័តក្រោមរដ្ឋបាលលោក Biden។

លើវេទិកាប្រព័ន្ធផ្សព្វផ្សាយសង្គម Truth Social លោក Trump បានសរសេរថា៖ លោកនឹងផ្អាកអន្តោប្រវេសន៍ជាអចិន្ត្រៃយ៍ពីប្រទេសតតិយលោកទាំងអស់ ដើម្បីអនុញ្ញាតឱ្យប្រព័ន្ធរបស់សហរដ្ឋអាមេរិក ងើបឡើងវិញឱ្យបានពេញលេញ និងលុបចោលនូវសំណើរាប់លានច្បាប់ ដែលស្នើចូលប្រទេសដោយខុសច្បាប់ក្រោមរដ្ឋបាលលោក Biden។

កាលពីថ្ងៃពុធសប្ដាហ៍នេះ សេវាសញ្ជាតិ និងអន្តោប្រវេសន៍របស់អាមេរិក បានបញ្ឈប់ដំណើរការនៃសំណើអន្តោប្រវេសន៍ទាំងអស់ ដែលទាក់ទងនឹងជនជាតិអាហ្វហ្គានីស្ថាន ដោយមិនកំណត់។ ក្រោយមក មន្ត្រីមកពីក្រសួងសន្តិសុខមាតុភូមិ និយាយថា លោក Trump បានបញ្ជាឱ្យពិនិត្យទ្រង់ទ្រាយធំលើករណីសិទ្ធិជ្រកកោន ដែលអនុម័តក្រោមរដ្ឋបាលលោក Biden និងបណ្ណបៃតង (Green Card) របស់ពលរដ្ឋនៃប្រទេសចំនួន១៩ ដែលលោក Trump ដាក់ក្នុងបញ្ជីហាមឃាត់កាលខែមិថុនា។

គួរឱ្យដឹងថា ឃ្លា "ប្រទេសតតិយលោក" មានដើមកំណើតក្នុងសម័យសង្គ្រាមត្រជាក់ ដើម្បីពិពណ៌នាអំពីប្រជាជាតិក្រីក្រ ដែលអព្យាក្រឹត្យ ឬមិនចូលបក្សសម្ព័ន្ធជាមួយមូលធននិយម "លោកទីមួយ ឬក្រុមលោកសេរី" ឬកុម្មុយនិស្ត "លោកទីពីរ"។ ប្រទេសមិនចូលបក្សសម្ព័ន្ធទាំងនេះរួមមានប្រទេសជាច្រើននៅអាហ្រ្វិក អាស៊ី និងអាមេរិកឡាទីន៕