ក្រុមសិទ្ធិមនុស្ស ដែលជាអង្គការលើកលែងទោសអន្តរជាតិ បានព្រមានកាលពីថ្ងៃព្រហស្បតិ៍ (២៧ វិច្ឆិកា) ថា "អាជ្ញាធរអ៊ីស្រាអែល នៅតែប្រព្រឹត្តអំពើប្រល័យពូជសាសន៍" នៅក្នុងតំបន់ហ្កាហ្សា ដោយធ្វើការវាយប្រហារថ្មីៗ និងរារាំងជំនួយសំខាន់ៗ ទោះបីជាមានបទឈប់បាញ់រួចហើយក៏ដោយ។

អាជ្ញាធរហ្កាហ្សា អះអាងថា អ៊ីស្រាអែល បានរំលោភលើកិច្ចព្រមព្រៀងឈប់បាញ់ម្តងហើយម្តងទៀត - ច្រើនជាង ៥០០ដងក្នុងពេល ៧សប្តាហ៍ - ហើយបានសម្លាប់ប្រជាជនប៉ាឡេស្ទីនជិត ៣៥០នាក់ និងរបួសជិត ៩០០នាក់ ចាប់តាំងពីកិច្ចព្រមព្រៀងឈប់បាញ់ ចូលជាធរមាននៅថ្ងៃទី១០ ខែតុលា មក។ ទិន្នន័យសុខាភិបាលហ្កាហ្សា បានឱ្យដឹងថា ប្រជាជនប៉ាឡេស្ទីនជិត ៧ម៉ឺននាក់ ត្រូវបានសម្លាប់ ចាប់តាំងពីសង្រ្គាមផ្ទុះឡើងកាលឆ្នាំ២០២៣មក។

ចេញសេចក្តីថ្លែងការណ៍របស់អង្គការសិទ្ធិមនុស្សកាលពីថ្ងៃព្រហស្បតិ៍នោះ បានកើតឡើងស្របពេលកងកម្លាំងអ៊ីស្រាអែល បានវាយប្រហារតាមអាកាសជាបន្តបន្ទាប់នៅភាគខាងត្បូង និងកណ្តាលហ្កាហ្សា រួមទាំងនៅក្នុងតំបន់ហួសពីបន្ទាត់ពណ៌លឿង ដែលពួកគេឈរជើង នៅក្រោមកិច្ចព្រមព្រៀង។

អ្នកឆ្លើយឆ្លងព័ត៌មានរបស់កាសែត Al Jazeera ដែលនៅហ្កាហ្សាផ្ទាល់ បានឱ្យដឹងថា ការវាយប្រហារមួយចំនួនរបស់អ៊ីស្រាអែល កាលពីព្រឹកថ្ងៃព្រហស្បតិ៍កន្លងទៅ បានកំណត់គោលដៅលើអគារនានានៅកណ្តាលជំរំជនភៀសខ្លួន Bureij របស់ហ្កាហ្សា និងភាគខាងកើតក្រុង Khan Younis។ របាយការណ៍និយាយថា មនុស្សរាប់សិបនាក់បានស្លាប់ក្នុងការវាយប្រហារនោះ៕