ប្រធានាធិបតីអាមេរិក លោក Donald Trump កាលពីថ្ងៃព្រហស្បតិ៍ (ទី២៧ ខែវិច្ឆិកា) បានប្រាប់ឲ្យដឹងថា សហរដ្ឋអាមេរិកនឹងចាប់ផ្តើមចាត់វិធានការឆាប់ៗ ដើម្បីបញ្ឈប់ជនសង្ស័យជួញដូរគ្រឿងញៀនវ៉េណេស៊ុយអេឡា នៅលើដីគោក។

អំឡុងពេលនិយាយទៅកាន់សមាជិកសេវាយោធា តាមអនឡាញ លោក Trump បានបញ្ជាក់ថា៖ «អ្នកប្រហែលជាបានកត់សម្គាល់ថា ជនទាំងនោះមិនជ្រើសរើសដឹកជញ្ជូនតាមសមុទ្រទៀតទេ តែយើងក៏នឹងចាប់ផ្តើមបញ្ឈប់ពួកគេតាមផ្លូវគោកផងដែរ។ ដីគោកមានភាពងាយស្រួលជាង តែវិធានការនឹងចាប់ផ្តើមក្នុងពេលឆាប់ៗ»។

ពាក់ព័ន្ធនឹងការលើកឡើងរបស់លោក Trump នេះ ក្រសួងទំនាក់ទំនងវ៉េណេស៊ុយអេឡា មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

រដ្ឋបាលរបស់លោក Trump បាននិងកំពុងថ្លឹងថ្លែងលើជម្រើសទាក់ទងនឹងវ៉េណេស៊ុយអេឡា ដើម្បីប្រយុទ្ធប្រឆាំងនឹងអ្វីដែលខ្លួនបានពណ៌នាថា ជាការមានចំណែករួមរបស់ប្រធានាធិបតីវ៉េណេស៊ុយអេឡា លោក Nicolas Maduro ក្នុងការផ្គត់ផ្គង់គ្រឿងញៀនខុសច្បាប់ ដែលបានសម្លាប់ជនជាតិអាមេរិក។ តែលោក Maduro បានបដិសេធថា មិនមានទំនាក់ទំនងជាមួយនឹងការជួញដូរគ្រឿងញៀនខុសច្បាប់នោះទេ។

គួរបញ្ជាក់ថា រហូតមកដល់ពេលនេះ កងកម្លាំងសហរដ្ឋអាមេរិក នៅក្នុងតំបន់នេះ បានផ្តោតលើប្រតិបត្តិការប្រឆាំងគ្រឿងញៀន ទោះបីជាការដាក់ពង្រាយកងកម្លាំង មានលើសពីអ្វីដែលចាំបាច់ ដើម្បីចាត់វិធានការលើក្រុមនោះក៏ដោយ។ ទាហានអាមេរិកបានធ្វើការវាយប្រហារយ៉ាងហោចណាស់ ២១លើក លើទូកសង្ស័យដឹកគ្រឿងញៀន នៅតំបន់ការ៉ាអ៊ីប និងមហាសមុទ្រប៉ាស៊ីហ្វិក ចាប់តាំងពីខែកញ្ញា ដោយបានសម្លាប់មនុស្សយ៉ាងតិច ៨៣នាក់៕