មន្ត្រីអង្គការសហប្រជាជាតិមួយរូប កាលពីថ្ងៃព្រហស្បតិ៍ (ទី២៧ ខែវិច្ឆិកា) បានប្រាប់ថា ការបាញ់ប្រហារលើទាហានឆ្មាំជាតិ ២នាក់ នៅជិតសេតវិមាន មិនគួរជាហេតុផល ដើម្បីឲ្យរដ្ឋបាលរបស់ប្រធានាធិបតីអាមេរិក លោក Donald Trump ពិនិត្យឡើងវិញនូវគោលនយោបាយអន្តោប្រវេសន៍របស់ខ្លួន ចំពោះពលរដ្ឋអាហ្វហ្គានីស្ថាននោះឡើយ។

គួរបញ្ជាក់ថា ប្រព័ន្ធផ្សព្វផ្សាយអាមេរិក បានរាយការណ៍ថា បុរសដែលត្រូវបានសង្ស័យថា ជាអ្នកបាញ់ប្រហារ កាលពីថ្ងៃពុធ គឺជាជនជាតិអាហ្វហ្គានីស្ថាន ដែលធ្វើការជាមួយកងកម្លាំងសហរដ្ឋអាមេរិក ក្នុងប្រទេសអាហ្វហ្គានីស្ថាន មុនពេលទៅសហរដ្ឋអាមេរិក កាលពី ៤ឆ្នាំមុន។

លោក Trump បានថ្កោលទោសការបាញ់ប្រហារនេះ ហើយបានអំពាវនាវភ្លាមៗដល់រដ្ឋបាលរបស់លោកឲ្យ «ពិនិត្យមើលឡើងវិញ» លើបុគ្គលទាំងអស់ដែលបានចូលមកសហរដ្ឋអាមេរិកពីអាហ្វហ្គានីស្ថាន ក្នុងអំឡុងរដ្ឋបាលរបស់លោក Joe Biden។

ប្រធានទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) នៅទីក្រុងកាប៊ុល ប្រទេសអាហ្វហ្គានីស្ថាន លោក Arafat Jamal បាននិយាយថា៖ «វាគឺជាឧក្រិដ្ឋកម្មគួរឲ្យស្អប់ខ្ពើម ជាអ្វីដែលបុគ្គលនេះកំពុងត្រូវបានចោទប្រកាន់ ហើយបើវាជាការពិត ដូចបានកើតឡើងនោះ យើងពិតជាថ្កោលទោសចំពោះទង្វើនេះ»។

តែយ៉ាងណាក្ដី លោកបានបន្ថែមថា លោកសង្ឃឹមថា ហេតុការណ៍នេះ «មិនប៉ះពាល់នោះឡើយដល់ពលរដ្ឋអាហ្វហ្គានីស្ថាន និងអ្នកស្វែងរកសិទ្ធិជ្រកកោន និងជនភៀសខ្លួនផ្សេងទៀត» នៅក្នុងសហរដ្ឋអាមេរិក។ អំឡុងដំណើរទស្សនកិច្ចទៅកាន់ទីក្រុងប្រ៊ុចសែល ប្រទេសបែលហ្ស៊ិក ដើម្បីចូលរួមកិច្ចប្រជុំជាមួយមន្ត្រីសហភាពអឺរ៉ុប លោកបានបញ្ជាក់ថា៖ «ខ្ញុំមានក្ដីបារម្ភបន្តិច នៅពេលដែលខ្ញុំបានឃើញរបាយការណ៍ព័ត៌មាន ដែលលើកឡើងជាប់ជានិច្ច អំពីប្រវត្តិជាពលរដ្ឋអាហ្វហ្គានីស្ថានរបស់ជននោះ»។

លោកប្រធានរូបនេះបានសង្កត់ធ្ងន់ថា លោកសង្ឃឹមថា វានឹងមិនធ្វើឲ្យមានការគិតអវិជ្ជមានលើពលរដ្ឋអាហ្វហ្គានីស្ថានផ្សេងទៀត ទាំងនៅសហរដ្ឋអាមេរិក និងប្រទេសដទៃទៀត ដែលជួយជនជាតិអាមេរិកយ៉ាងស្មោះត្រង់ អំឡុងពេលពួកគេរស់នៅអាហ្វហ្គានីស្ថាន៕