ហ៊្សកដានី បានទាមទារឲ្យក្រុមអាជ្ញាធររុស្ស៊ីបញ្ឈប់ការជ្រើសរើសដោយខុសច្បាប់ពលរដ្ឋរបស់ខ្លួន ក្រោយជនជាតិហ៊្សកដានី ២នាក់ ត្រូវបានសម្លាប់ អំឡុងពេលប្រយុទ្ធឲ្យយោធារុស្ស៊ី ។

ក្រសួងការបរទេសហ៊្សកដានី បានចេញការព្រមានកាលពីថ្ងៃព្រហស្បតិ៍ប្រឆាំងនឹងទីក្រុងមូស្គូ និងអង្គភាពខាងក្រៅធ្វើការតាមអនឡាញ ដើម្បីជ្រើសរើសមនុស្សតាងនាមឲ្យទីក្រុងមូស្គូ ។

ពួកគេពុំបានអះអាងពីសង្រ្គាមរយៈពេលជិត ៤ឆ្នាំរបស់រុស្ស៊ីនៅអ៊ុយក្រែននោះទេ ជាទីដែលទាហានស៊ីឈ្នូលបរទេសរាប់ពាន់នាក់ បានចូលរួមខាងភាគីរុស្ស៊ី ។

នៅក្នុងសេចក្តីថ្លែងការណ៍ដែលបានចែករំលែកនៅលើបណ្តាញព័ត៌មានសង្គម X ក្រសួងការបរទេសហ៊្សកដានី និយាយថា ពួកគេនឹងចាត់វិធានការទាំងអស់ដែលមាន ដើម្បីបញ្ចប់ការជ្រើសរើសពលរដ្ឋហ៊្សកដានីបន្ថែមទៀត និងសូមអំពាវនាវឲ្យទីក្រុងមូស្គូបញ្ចប់កិច្ចសន្យារបស់ពលរដ្ឋពួកគេដែលបានចុះឈ្មោះនាពេលកន្លងមក ។

ក្រសួងបន្តថា ការជ្រើសរើសនេះ គឺជាការបំពានទាំងច្បាប់ក្នុងស្រុកហ៊្សកដានី និងច្បាប់អន្តរជាតិ និងធ្វើឲ្យគ្រោះថ្នាក់ដល់អាយុជីវិតប្រជាពលរដ្ឋរបស់ខ្លួន ។

សេចក្តីថ្លែងការណ៍នេះ ពុំបានផ្តល់ព័ត៌មានលម្អិតបន្ថែមទៀតនោះទេ ឬនិយាយថា ទីកន្លែងណា ឬពេលណាដែលពលរដ្ឋ ២នាក់របស់ខ្លួន ត្រូវបានសម្លាប់ បើទោះបីជារុស្ស៊ីមានប្រវត្តិជ្រើសរើសជនបរទេស ឲ្យប្រយុទ្ធនៅអ៊ុយក្រែនក៏ដោយ ។

អ៊ុយក្រែននិយាយថា ទីក្រុងមូស្គូ បានជ្រើសរើសយុទ្ធជនបរទេសយ៉ាងហោច ១៨.០០០នាក់ មកពីបណ្តាប្រទេសចំនួន ១២៨ ។ លោកឧត្តមសេនីយ៍ឯកអ៊ុយក្រែន Dmytro Usov និយាយនៅក្នុងសារបង្ហោះលើបណ្តាញព័ត៌មានសង្គម Telegramថា យុទ្ធជនបរទេស ៣.៣៨៨នាក់ផ្សេងទៀត បានស្លាប់ អំឡុងពេលប្រយុទ្ធឲ្យយោធារុស្ស៊ី ៕