អធិការបតីអាល្លឺម៉ង់លោក Friedrich Merz បាននិយាយកាលពីថ្ងៃព្រហស្បតិ៍ (ទី២៧ ខែវិច្ឆកា) ថា លោកនឹងជំរុញឲ្យប្រធានាធិបតីអាមេរិក លោក Donald Trump ពិចារណាឡើងវិញនូវការសម្រេចចិត្តរបស់លោក ក្នុងការរារាំងអាហ្វ្រិកខាងត្បូងមិនឲ្យចូលរួមកិច្ចប្រជុំកំពូលរបស់ប្រទេសទាំង២០ (G20) នៅឆ្នាំ២០២៦ ក្នុងរដ្ឋ Florida សហរដ្ឋអាមេរិក។

សហរដ្ឋអាមេរិក និងអាហ្រ្វិកខាងត្បូង មានជម្លោះជាមួយគ្នា ជុំវិញគោលនយោបាយទាំងក្នុងស្រុក និងបរទេស ហើយកាលពីសប្តាហ៍មុន ទីក្រុងវ៉ាស៊ីនតោនបានបដិសេធមិនចូលរួមកិច្ចប្រជុំ G20 នៅទីក្រុង Johannesburg របស់អាហ្វ្រិកខាងត្បូង។

លោក Trump បានប្រឈមជាមួយប្រធានាធិបតីអាហ្រ្វិកខាងត្បូង លោក Cyril Ramaphosa ក្នុងអំឡុងពេលមានដំណើរទស្សនកិច្ចទៅកាន់សេតវិមាន កាលពីដើមឆ្នាំនេះ ដោយបានលើកឡើងជុំវិញការអះអាងមិនពិតដែលថា «មានអំពើប្រល័យពូជសាសន៍លើជនស្បែកស» នៅក្នុងប្រទេសនេះ។

ហើយកាលពីថ្ងៃពុធ លោក Trump បាននិយាយថា លោកកំពុងដកប្រទេសអាហ្រ្វិកខាងត្បូងចេញពីកិច្ចប្រជុំកំពូលឆ្នាំ២០២៦ ដែលនឹងត្រូវធ្វើឡើងនៅរមណីយដ្ឋានវាយកូនហ្គោលផ្ទាល់ខ្លួនរបស់លោក ក្នុងទីក្រុង Miami ដោយលើកឡើងពីការចោទប្រកាន់ ដែលថា មាន «ការរំលោភបំពានសិទ្ធិមនុស្សដ៏គួរឲ្យរន្ធត់» លើជនជាតិស្បែកសអាហ្វ្រិកខាងត្បូង។

យ៉ាងណាក្ដី លោក Merz បានប្រាប់សន្និសីទកាសែតនៅទីក្រុងប៊ែរឡាំងថា៖ «ខ្ញុំនឹងព្យាយាម ទាំងនៅក្នុងការសន្ទនា និងជំនួបរបស់ខ្ញុំជាមួយប្រធានាធិបតីអាមេរិក ដើម្បីបញ្ចុះបញ្ចូលលោកថា វាគឺជាការល្អក្នុងការអញ្ជើញសមាជិកទាំងអស់នៃ G20 ទៅកាន់សហរដ្ឋអាមេរិក»៕