លោកប្រធានាធិបតី វ្ល៉ាឌីមៀ ពូទីន បានថ្លែងថា រុស្ស៊ីត្រៀមខ្លួនរួចជាស្រេច ដើម្បីដោះស្រាយបញ្ហាទាំងអស់ដែលទាក់ទងនឹងស្ថិរភាពជាយុទ្ធសាស្ត្រ ក្នុងកិច្ចសហប្រតិបត្តិការជាមួយសហរដ្ឋអាមេរិក។ ជាការឆ្លើយតបទៅនឹងសំណួររបស់អ្នកសារព័ត៌មាន លោក ពូទីន បានសង្កត់ធ្ងន់ថា៖«យើងត្រៀមខ្លួនរួចជាស្រេចដើម្បីពិភាក្សាអំពីបញ្ហាទាំងអស់ដែលទាក់ទងនឹងស្ថិរភាពជាយុទ្ធសាស្ត្ររួមគ្នា ជាមួយរដ្ឋបាលសហរដ្ឋអាមេរិក»។

នៅពេលសួរថាតើក្រោមការណែនាំរបស់លោក ទីភ្នាក់ងាររដ្ឋាភិបាលរុស្ស៊ី និងសេវាស៊ើបការណ៍សម្ងាត់បានវាយតម្លៃលទ្ធភាពនៃការសាកល្បងអាវុធនុយក្លេអ៊ែរ បន្ទាប់ពីសេចក្តីថ្លែងការណ៍ថ្មីៗរបស់ប្រធានាធិបតីអាមេរិក ដូណាល់ ត្រាំ ដែរឬទេ លោក ពូទីន បានបញ្ជាក់ថា លោកបានណែនាំក្រុមប្រឹក្សាសន្តិសុខរុស្ស៊ីឲ្យប្រមូលព័ត៌មានបន្ថែមអំពីសកម្មភាពរបស់សហរដ្ឋអាមេរិក វិភាគទិន្នន័យ និងបង្កើតសំណើសម្រាប់លទ្ធភាពឆ្លើយតបរបស់រុស្ស៊ី។ លោកបានកត់សម្គាល់ថា៖«សំណើមួយក្នុងចំណោមសំណើដែលយើងទទួលបាន គឺសហការជាមួយសហរដ្ឋអាមេរិកលើបញ្ហានេះ។ យើងយល់ថា វិធីសាស្រ្តនេះសមស្រប ដោយផ្អែកលើអ្វីដែលយើងសង្កេតឃើញ»។

លោក ត្រាំ បានប្រកាសនៅថ្ងៃទី ២៩ ខែតុលាថា លោកបានណែនាំមន្ទីរបញ្ចកោណឲ្យបន្តការសាកល្បងនុយក្លេអ៊ែរជាបន្ទាន់ ដោយលើកឡើងពីការព្រួយបារម្ភថា ប្រទេសដទៃទៀត កំពុងធ្វើតេស្តបែបនេះរួច   ហើយ។ លោកមិនបានបញ្ជាក់ពីលក្ខណៈនៃការធ្វើតេស្តទាំងនេះ ឬថាតើវាពាក់ព័ន្ធនឹងក្បាលគ្រាប់នុយក្លេអ៊ែរដែរឬទេ។

បន្ទាប់មក នៅថ្ងៃទី ០៥ ខែវិច្ឆិកា ក្នុងអំឡុងពេលកិច្ចប្រជុំជាមួយក្រុមប្រឹក្សាសន្តិសុខរុស្ស៊ី លោក ពូទីន បានប្រគល់ភារកិច្ចឲ្យក្រសួងការបរទេស ក្រសួងការពារជាតិ សេវាពិសេស និងអាជ្ញាធរស៊ីវិលប្រមូល និងវិភាគព័ត៌មានបន្ថែម។ លោកបានស្នើសុំឲ្យពួកគេ «ដាក់សំណើសម្របសម្រួលលើការចាប់ផ្តើមនៃការរៀបចំសម្រាប់ការសាកល្បងអាវុធនុយក្លេអ៊ែរ»។ អ្នកនាំពាក្យប្រធានាធិបតី លោក Dmitry Peskov បានបញ្ជាក់ថា លោក ពូទីន មិនបានបញ្ជាឲ្យចាប់ផ្តើមការធ្វើតេស្តនោះទេ ប៉ុន្តែគ្រាន់តែណែនាំមន្ត្រីឲ្យវាយតម្លៃពីលទ្ធភាពនៃការរៀបចំដំបូង ដោយផ្អែកលើសកម្មភាពរបស់សហរដ្ឋអាមេរិកប៉ុណ្ណោះ៕