អ្នកការទូតជាន់ខ្ពស់របស់ចិន លោក Wang Yi បានប្រើប្រាស់ឱកាសជជែកតាមទូរសព្ទជាមួយសមភាគីបារាំងរបស់លោក ដើម្បីរំលឹកថា ភាគីទាំង២ ចាំបាច់ត្រូវគាំទ្រគ្នាទៅវិញទៅមក ដោយបានគូសបញ្ជាក់ពីការជំរុញរបស់ទីក្រុងប៉េកាំង ក្នុងការទទួលបានការគាំទ្រផ្នែកការទូត អំឡុងពេលមានជម្លោះជាមួយប្រទេសជប៉ុន។

អំឡុងជជែកតាមទូរសព្ទកាលពីថ្ងៃទី២៧ ខែវិច្ឆិកាជាមួយទីប្រឹក្សាការទូតរបស់លោកប្រធានាធិបតីបារាំង គឺលោក Emmanuel Bonne លោក Wang បានបញ្ជាក់ថា នាយករដ្ឋមន្ត្រីជប៉ុន លោកស្រី Sanae Takaichi បាន «ធ្វើនូវសេចក្ដីកត់សម្គាល់បង្កហេតុ ទាក់ទងនឹងកោះតៃវ៉ាន់» នៅដើមខែវិច្ឆិកានេះ។

បើយោងតាមសេចក្តីថ្លែងការណ៍របស់ក្រសួងការបរទេស នៅទីក្រុងប៉េកាំង បានឲ្យដឹងថា លោក Wang បានសង្កត់ធ្ងន់ថា ទីក្រុងប៉េកាំង និងប៉ារីស គួរតែ «គាំទ្រគ្នាទៅវិញទៅមកយ៉ាងម៉ឺងម៉ាត់ ជុំវិញបញ្ហាដែលពាក់ព័ន្ធនឹងផលប្រយោជន៍ស្នូលរបស់គ្នាទៅវិញទៅមក។ ខ្ញុំសង្ឃឹមថា ភាគីបារាំងនឹងបន្តគោរពយ៉ាងម៉ឺងម៉ាត់នូវគោលការណ៍ចិនតែមួយ»។

ពាក់ព័ន្ធនឹងនឹងការលើកឡើងនេះ ស្ថានទូតបារាំង ប្រចាំនៅទីក្រុងប៉េកាំង មិនបានឆ្លើយតបភ្លាមៗឡើយ ចំពោះការស្នើសុំការអត្ថាធិប្បាយដែលបានផ្ញើមុនពេលចាប់ផ្តើមម៉ោងការងារ នៅថ្ងៃសុក្រ (ទី២៨ ខែវិច្ឆិកា)។ ប្រធានាធិបតីបារាំង លោក Emmanuel Macron គ្រោងនឹងធ្វើទស្សនកិច្ចផ្លូវរដ្ឋទៅកាន់ប្រទេសចិន នៅសប្តាហ៍ក្រោយ ហើយបញ្ហាសេដ្ឋកិច្ច និងពាណិជ្ជកម្ម នឹងត្រូវបានលើកយកមកពិភាក្សា៕