ប្រព័ន្ធផ្សព្វផ្សាយរដ្ឋស៊ីរី បានរាយការណ៍ថា មនុស្ស ១០នាក់យ៉ាងតិច បានបាត់បង់ជីវិត ដោយសារការបាញ់ប្រហាររបស់អ៊ីស្រាអែល ក្នុងភូមិមួយ នៅភាគខាងត្បូងនៃប្រទេសស៊ីរី នាថ្ងៃសុក្រ (ទី២៨ ខែវិច្ឆិកា) នេះ ខណៈដែលយោធាអ៊ីស្រាអែល បានប្រាប់ថា ទាហាន ៥នាក់ បានរងរបួសនៅក្នុងការប៉ះទង្គិចគ្នា ក្នុងអំឡុងពេលមានប្រតិបត្តិការមួយ ដើម្បីចាប់ខ្លួនសមាជិកនៃក្រុមសកម្មប្រយុទ្ធ នៅទីនោះ។

សេចក្ដីរាយការណ៍ពីប្រព័ន្ធផ្សព្វផ្សាយរដ្ឋស៊ីរី បានលើកឡើងថា ការវាយឆ្មក់របស់អ៊ីស្រាអែល នៅក្នុងតំបន់ Beit Jinn បានក្លាយទៅជាឧប្បត្តិហេតុបណ្ដាលឲ្យមានអ្នកស្លាប់ច្រើនបំផុតមួយ គិតចាប់តាំងពីប្រធានាធិបតី លោក Bashar al-Assad ត្រូវបានទម្លាក់ចេញពីអំណាច កាលពីមួយឆ្នាំមុន។ អ៊ីស្រាអែលបានបង្កើនការលុកលុយជាប្រចាំនៅភាគខាងត្បូងស៊ីរី ចាប់តាំងពីពេលនោះមក ដោយលើកឡើងពីគោលដៅដែលរួមបញ្ចូលការបន្តរុញឲ្យពួកសកម្មប្រយុទ្ធនៅឆ្ងាយពីព្រំដែន។

យោធាអ៊ីស្រាអែលបានឲ្យដឹងថា កងទ័ពរបស់ខ្លួន បានរងការបាញ់ប្រហារពីពួកសកម្មប្រយុទ្ធ ក្នុងអំឡុងពេលមានប្រតិបត្តិការមួយនាពេលយប់ ដើម្បីចាប់ឃុំខ្លួនជនសង្ស័យជាសមាជិករបស់ក្រុម ដែលខ្លួនកំណត់ថា ជាក្រុម Jaama Islamiya។ យោធាបានពិពណ៌នាអំពីការវាយឆ្មក់នេះថា ជាផ្នែកនៃប្រតិបត្តិការជាប្រចាំ នៅតំបន់នេះ ក្នុងប៉ុន្មានខែថ្មីៗនេះ។

ទីភ្នាក់ងារសារព័ត៌មានរដ្ឋស៊ីរី SANA ដែលបានដកស្រង់សម្តីពីប្រធាននាយកដ្ឋានសុខាភិបាល ក្នុងតំបន់រដ្ឋបាលរបស់ទីក្រុងដាម៉ាស បានរាយការណ៍ថា មនុស្សយ៉ាងហោចណាស់ ១០នាក់ ត្រូវបានសម្លាប់ ហើយរាប់សិបនាក់ទៀតរងរបួស ដោយសារការវាយប្រហាររបស់អ៊ីស្រាអែល។ សារព័ត៌មាននេះបានរាយការណ៍នៅមុននេះថា អ្នកស្លាប់ក៏រួមមានកុមារ ២នាក់ផងដែរ៕