នៅថ្ងៃសុក្រនេះ រដ្ឋមន្រ្តីការពារជាតិរ៉ូម៉ានីលោក Ionut Mosteanu បានលាលែងពីតំណែងរបស់លោក ក្រោយទទួលស្គាល់ថា លោកនិយាយកុហសចំពោះការសិក្សារបស់លោកនៅក្នុងជីវប្រវត្តិរូបសង្ខេប ដោយលោកនិយាយថា លោកមិនចង់មានកំហុសផ្ទាល់ខ្លួននោះទេ ធ្វើឲ្យរំខានដល់ការងារសំខាន់ ក្នុងការរក្សាប្រទេសឲ្យមានសុវត្ថិភាពពីរុស្ស៊ី ។

ការលាលែងពីតំណែងរបស់លោក Mosteanu បានកើតមាន ក្រោយកាសែតប្រចាំថ្ងៃ Libertatea រាយការណ៍ក្នុងសប្តាហ៍នេះថា ជីវប្រវត្តិរូបសង្ខេបរបស់លោកមានព័ត៌មានពុំត្រឹមត្រូវពីពេល ដែលលោកបញ្ចប់ការសិក្សានៅសាកលវិទ្យាល័យ ។ 

លោក Mosteanu សរសេរនៅលើបណ្តាញព័ត៌មានសង្គម Facebook ដើម្បីប្រកាសលាលែងចេញពីតំណែងរបស់លោកថា រ៉ូម៉ានី និងអឺរ៉ុប ស្ថិតក្រោមការវាយប្រហាររបស់រុស្ស៊ី ។ 

 គួរឲ្យដឹងថា រ៉ូម៉ានីដែលជារដ្ឋសមាជិកអង្គការណាតូ និងសហភាពអឺរ៉ុប មានព្រំដែនជើងគោករួមគ្នាចម្ងាយ ៦៥០គ.មជាមួយអ៊ុយក្រែន ហើយត្រូវបានមើលឃើញយានដ្រូនរុស្ស៊ីបំពានម្តងហើយម្តងទៀតលើដែនអាកាសរបស់ពួកគេ ចាប់តាំងពីទីក្រុងមូស្គូ វាយលុកទីក្រុងគីវ ។

 លោកនាយករដ្ឋមន្រ្តីសេរីនិយម Ilie Bolojan បានថ្លែងអំណរគុណលោក Mosteanu សម្រាប់ការងាររយៈពេល ៥ខែរបស់គាត់ ហើយលោកនិយាយថា រដ្ឋមន្រ្តីសេដ្ឋកិច្ចលោក Radu Miruta នឹងធ្វើជារដ្ឋមន្រ្តីការពារជាតិស្តីទី ៕