នាយករដ្ឋមន្ត្រីបែលហ្ស៊ិក លោក Bart De Wever បាននិយាយថា ផែនការរបស់សហភាពអឺរ៉ុប (EU) ក្នុងការប្រើប្រាស់ទ្រព្យសម្បត្តិរដ្ឋរបស់រុស្ស៊ីដែលត្រូវបានបង្កក ដើម្បីផ្តល់មូលនិធិដល់អ៊ុយក្រែន អាចបំផ្លាញឱកាសដែលអាចមានកិច្ចព្រមព្រៀងសន្តិភាព ដើម្បីបញ្ចប់សង្រ្គាមជិត ៤ឆ្នាំ។

ការគាំទ្ររបស់បែលហ្ស៊ិក សម្រាប់ផែនការនេះ គឺមានសារៈសំខាន់ ដោយសារទ្រព្យសម្បត្តិដែល EU សង្ឃឹមថា នឹងយកទៅប្រើប្រាស់ ត្រូវបានកាន់កាប់ដោយស្ថាប័នហិរញ្ញវត្ថុ Euroclear របស់បែលហ្ស៊ិក។

គួរបញ្ជាក់ថា នៅក្នុងកិច្ចប្រជុំកំពូល កាលពីខែមុន បណ្ដាមេដឹកនាំ EU បានព្យាយាមយល់ព្រមលើផែនការប្រើប្រាស់ទឹកប្រាក់ ១៤០ពាន់លានអឺរ៉ូ (១៦២ពាន់លានដុល្លារ) ពីក្នុងទ្រព្យសម្បត្តិអធិបតេយ្យរបស់រុស្ស៊ីដែលត្រូវបានផ្អឹបទុកនៅអឺរ៉ុប ជាប្រាក់កម្ចី សម្រាប់ទីក្រុងគីវ ប៉ុន្តែមិនទទួលបានការគាំទ្រពីបែលហ្ស៊ិកឡើយ។

ហើយនៅក្នុងលិខិតផ្ញើទៅកាន់ប្រធានគណៈកម្មការអឺរ៉ុប លោកស្រី Ursula von der Leyen លោក De Wever បានបញ្ជាក់ថា៖ «ការប្រញាប់ប្រញាល់ជំរុញគម្រោងផ្ដល់កម្ចីជាសំណងសង្គ្រាមដែលត្រូវបានស្នើឡើង នឹងធ្វើឲ្យមានផលប៉ះពាល់អវិជ្ជមាន ខណៈដែលយើងជាសហភាពអឺរ៉ុប កំពុងរាំងស្ទះប្រកបដោយប្រសិទ្ធភាព ចំពោះការឈានដល់កិច្ចព្រមព្រៀងសន្តិភាពជាយថាហេតុ»។

លិខិតនេះបានលេចឡើងនៅពេលដែលគណៈកម្មការ ដែលជាស្ថាប័នប្រតិបត្តិរបស់ EU រៀបចំ ដើម្បីដោះស្រាយកង្វល់របស់បែលហ្ស៊ិក ក្នុងសេចក្តីព្រាងច្បាប់ ស្តីពីការប្រើប្រាស់ទ្រព្យសម្បត្តិបង្កក ដែលមន្ត្រី EU លើកឡើងថា អាចត្រូវបានបង្ហាញនៅថ្ងៃសុក្រនេះ ឬនៅចុងសប្តាហ៍។

លោក De Wever បាននិយាយថា ប្រទេសបែលហ្ស៊ិកមិនទាន់បានឃើញ «ភាសាច្បាប់ណាមួយដែលបានត្រូវបានស្នើឡើងដោយគណៈកម្មការ» នៅឡើយទេ។ គណៈកម្មការអឺរ៉ុប មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ ពាក់ព័ន្ធនឹងលិខិត៕