កីឡាអេឡិចត្រូនិក៖ ការប្រកួតកីឡាអេឡិចត្រូនិកវិញ្ញាសា PUBG Mobile ស្ដីពីដំណើរឆ្ពោះទៅស៊ីហ្គេមលើកទី៣១ នៅវៀតណាម និងត្រៀមស៊ីហ្គេមលើកទី៣២ ឆ្នាំ២០២៣ បានបញ្ចប់ហើយ ក្រោយឆ្លងកាត់ការប្រកួតជុំផ្ដាច់ព្រ័ត្រនៅផ្សារទំនើបអ៊ីអនកាលពីចុងសប្ដាហ៍កន្លងទៅ ក្រោមវត្តមានលោក លន់ សាមឌី អគ្គលេខាធិការសហព័ន្ធកីឡាអេឡិចត្រូនិកកម្ពុជា។
ការប្រកួតនេះបានចាប់ផ្ដើមតាំងពីថ្ងៃទី២៧ ខែមករារហូតដល់ថ្ងៃទី១៩ ខែកុម្ភៈដោយមានក្រុមចុះឈ្មោះចូលរួម ១៦០ក្រុមក្នុងគោលបំណងជ្រើសរើសក្រុមលេខ១ ដល់លេខ៤ លើវិញ្ញាសា PUBG Mobile ដើម្បីសម្រិតសម្រាំងកីឡាករចុងក្រោយ សម្រាប់ក្លាយជាក្រុមជម្រើសជាតិកម្ពុជាទៅប្រកួតកីឡាស៊ីហ្គេមលើកទី៣១ នៅប្រទេសវៀតណាម។ ដូច្នេះមានន័យថា ក្រុមជ័យលាភីទាំង ៤ នៅមិនទាន់មានឈ្មោះជាក្រុមជម្រើសជាតិផ្លូវការនោះទេ ប៉ុន្តែនឹងមានការជ្រើសរើសសមាជិកដែលមានជំនាញរៀងៗខ្លួន ដើម្បីបង្កើតជាក្រុមជម្រើសជាតិ។ ជាលទ្ធផលក្រោយបញ្ចប់ការប្រកួតដ៏ស្វិតស្វាញសម្រាប់ក្រុមជ័យលាភីទាំង ៤ក្រុមរួមមានលេខ១ ក្រុម Kill Enemy, លេខ២ ក្រុម Angkor PUBG, លេខ៣ ក្រុម Samurai EES និងលេខ៤ ក្រុម The Quarter។ ទន្ទឹមជាមួយគ្នា សហព័ន្ធក៏គ្រោងបង្កើតគណៈកម្មាបច្ចេកទេសមួយដើម្បីជ្រើសរើសគ្រូបង្វឹក និងកីឡាករជម្រើសជាតិដែលជាផ្នែកនៃការអភិវឌ្ឍ បង្កើនសមត្ថភាព បំផុសបំផុល និងជំរុញកីឡាអេឡិចត្រូនិកកម្ពុជា ដើម្បីឲ្យរីកចម្រើនឈានឡើងលំដាប់អន្តរជាតិ សម្រាប់ត្រៀមខ្លួនប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះផងដែរ។
លោក លន់ សាមឌី បានបញ្ជាក់ថា ការរៀបចំព្រឹត្តិការណ៍នេះគឺជាការបោះជំហានថ្មីមួយទៀត នៃកីឡាអេឡិចត្រូនិច ដើម្បីពង្រឹងសមត្ថភាព និងបច្ចេកទេសរបស់ក្រុមជម្រើសជាតិ សម្រាប់ត្រៀមការប្រកួតដ៏ធំប្រចាំតំបន់នាពេលខាងមុខ ហើយលោករំពឹងថា ក្នុងការប្រកួតកីឡាស៊ីហ្គេមនាពេលខាងមុខ កម្ពុជានឹងធ្វើបានល្អប្រសើរជាងស៊ីហ្គេមឆ្នាំ២០១៩ នៅប្រទេសហ្វីលីពីន។ សូមបញ្ជាក់ថា សម្រាប់ក្រុមជ័យលាភីនៃការប្រកួតវិញ្ញាសា PUBG Mobile សម្រាប់ក្រុមជើងឯកក្រុម Kill Enemy ទទួលបានប្រាក់រង្វាន់ ៣,៥០០ដុល្លារ, លេខ២ ក្រុម Angkor PUBG ទទួលបាន ២,០០០ដុល្លារ, លេខ៣ ក្រុម Samurai EES ទទួលបាន ១,០០០ដុល្លារ និងលេខ៤ ក្រុម The Quarter ទទួលបាន ៥០០ដុល្លារ៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
