យោងតាមការអះអាងរបស់អង្គការបណ្តាញគ្រូពេទ្យស៊ូដង់ បានឲ្យដឹងថា កងកម្លាំងគាំទ្ររហ័ស(RSF) បានប្តូរមន្ទីរពេទ្យ Al-Nuhud ស្ថិតក្នុងទីក្រុង West Kordofan នៅភាគខាងត្បូងប្រទេសស៊ូដង់ ទៅជាទីបញ្ជាការយោធា និងជាបន្ទាយទាហានរបស់ខ្លួន ចាប់តាំងពីពួកគេដណ្តើមបានទីក្រុងមួយនេះ កាលពីរយៈពេលជាង ៥ខែមុន ។

អង្គការមិនមែនរដ្ឋាភិបាលមួយនេះ និយាយនៅថ្ងៃសុក្រនេះថា កងកម្លាំង RSF ដែលជាគូប្រជែងស្លាប់រស់របស់កងកម្លាំងប្រដាប់អាវុធរដ្ឋាភិបាលស៊ូដង់(SAF) អំឡុងសង្រ្គាមស៊ីវិលដ៏ឃោឃៅរយៈពេល ៣ឆ្នាំនេះ បានរារាំងមិនឲ្យមន្ទីរពេទ្យផ្តល់សេវាកម្មថែទាំសុខភាពដល់ប្រជាពលរដ្ឋនោះឡើយ ។

ពួកគេបាននិយាយនៅក្នុងសេចក្តីថ្លែងការណ៍បង្ហោះលើបណ្តាញព័ត៌មានសង្គម Facebookថា ការប្រើប្រាស់មន្ទីរពេទ្យពីសំណាក់យោធា បំពានយ៉ាងច្បាស់ក្រឡែតលើភាពមិនអាចរំលោភបាននៃស្ថាប័នវេជ្ជសាស្រ្ត ហើយនិងធ្វើឲ្យអន្តរាយដល់សិទ្ធិទទួលបានការព្យាបាលរបស់ជនស៊ីវិល ។

ពួកគេបន្តថា គ្រូពេទ្យនៅមន្ទីរពេទ្យ Al-Nuhud រងការចោទប្រកាន់ថា បានសហការណ៍ជាមួយយោធា មុនពេលរត់ភៀសខ្លួនចេញពីទីក្រុង ។ ជាលទ្ធផល មន្ទីរពេទ្យនេះ ជួបកង្វះខាតធ្ងន់ធ្ងរបុគ្គលិកថែទាំសុខភាព ធ្វើឲ្យសេវាកម្មសេសសល់មានដែនកំណត់ធ្ងន់ធ្ងរ ហើយនិងមិនអាចឈានដល់តម្រូវការរបស់អ្នកជំងឺ ។

ចាប់តាំងពីខែមេសា ឆ្នាំ ២០២៣រហូតមក កងកម្លាំង SAF និងកម្លាំង RSF បានជាប់ផុងក្នុងសង្រ្គាមស៊ីវិលដែលការសម្របសម្រួលក្នុងតំបន់ និងអន្តរជាតិ មិនអាចបញ្ចប់វាបាន ។

សង្រ្គាមមួយនេះ បានសម្លាប់មនុស្សរាប់ម៉ឹននាក់ និងមនុស្សរាប់លាននាក់ផ្សេងទៀត ជម្លៀសខ្លួន បណ្តាលឲ្យកើតមានអ្វីដែលអង្គការសហប្រជាជាតិ ចាត់ទុកថាជា គ្រោះមហន្តរាយមនុស្សធម៌ធំបំផុតនៅលើពិភពលោក ៕