ឥណ្ឌា៖ ប្រទេសឥណ្ឌាបានរាយការណ៍កំណើនករណីឆ្លងជំងឺ COVID-19 ខ្ពស់បំផុតប្រចាំថ្ងៃនៅឆ្នាំនេះ កាលពីថ្ងៃអាទិត្យដោយមានអ្នកឆ្លងថ្មីចំនួន ២៥,៣២០នាក់ មួយថ្ងៃមុនពេលអនុម័តវិធានការបិទនៅក្នុងរដ្ឋមហារាស្ត្រភាគខាងលិច ដែលជាចំនួននៃការឆ្លងរាលដាលកើនឡើងខ្ពស់ជាថ្មី។
យោងតាមទិន្នន័យសុខភាពសហព័ន្ធ ការហក់ឡើងខ្ពស់នេះគឺជាការកើនឡើងច្រើនបំផុត ចាប់តាំងពីថ្ងៃទី១៦ ខែធ្នូ។ ឥណ្ឌាគឺជាប្រទេសមានករណីឆ្លងខ្ពស់បំផុតលំដាប់ទី៣ នៅក្នុងពិភពលោកដែលមានអ្នកឆ្លងសរុបជាង ១១លាន ៣៦ម៉ឺននាក់បន្ទាប់ពីសហរដ្ឋអាមេរិក និងប្រេស៊ីល។ ទិន្នន័យកាលពីថ្ងៃអាទិត្យបង្ហាញថា ចំនួនអ្នកស្លាប់ដោយសារជំងឺ COVID-19 នៅក្នុងប្រទេសឥណ្ឌាបានកើនឡើងដល់ ១៥៨,៦០៧នាក់ បន្ទាប់ពីមានអ្នកស្លាប់ថ្មីចំនួន ១៦១នាក់ក្នុងរយៈពេល ២៤ម៉ោងចុងក្រោយ បើធៀបទៅនឹងចំនួនជាមធ្យមមានប្រមាណ ១០០នាក់ប៉ុណ្ណោះចាប់តាំងពីដើមខែកុម្ភៈមក។
ស្រុកណាកពួរ ក្នុងរដ្ឋមហារាស្ត្រនឹងអនុវត្តធានការបិទនៅថ្ងៃច័ន្ទនេះ ជាលើកដំបូងចាប់តាំងពីបម្រាបទប់ស្កាត់វីរុសនៅទូទាំងប្រទេស ត្រូវបានដកកាលពីខែមិថុនា។ រដ្ឋនេះបានរាយការណ៍ពីចំនួនមនុស្សឆ្លងខ្ពស់បំផុត រហូតដល់ទៅជាង ២លាន ៣សែននាក់។ ចំណែកនៅក្នុងរដ្ឋធានីញូដេលីវិញ បានរាយការណ៍ករណីឆ្លងកើនឡើងជាបន្តបន្ទាប់ រយៈពេលជាង ២សប្ដាហ៍កន្លងទៅ ខណៈដែលក្រុមអាជ្ញាធរសុខភាពណែនាំ ឲ្យប្រជាពលរដ្ឋបង្កើនការប្រុងប្រយ័ត្នទប់ទល់នឹងការបន្ធូរដៃ ចំពោះវិធានការអនាម័យនានា៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
